Советникот на регионалниот директор за Европа на СЗО, д-р Фабио Скано рече дека од понеделникот, кога пристигнал во Скопје, остварил многу средби, меѓу кои со претседателот на државата Стево Пендаровски, со Комисијата за заразни болести, како и со претставници на верските заедници. Тој потенцира дека е импресиониран од пожртвуваноста на здравствените работници, кои неуморно работат за заштита на граѓаните од Ковид 19.
„Одговорот на Владата беше агилен, силен и навремен. Импресиониран сум од посветеноста на здравствените работници, на лекарите, на Институтот и Центрите за јавно здравје, и на сите останати кои неуморно работат за заштита на граѓаните од КОВИД-19. Конкретно ќе кажам, ставањето на структурите за одговор на оваа функција се случи рано, уште пред да се појави првиот случај. Агилното пренаменување на здравствените установи за лекување на болни од КОВИД-19, што овозможи болните да бидат згрижени, како и раните мерки за заштита на постарите луѓе во домовите за стари лица спречи голем број на смртни случаи, нешто што се случи во останатите земји. Повторното појавување на зголемен број случаи е нешто што може да се изменаџира, и затоа во иднина сите напори треба да бидат насочени кон спречување на ваквите појави. Ова ќе биде можно доколку власта и граѓаните си помогнат едни на други, и цврсто соработуваат. Ние како СЗО ја повторуваме нашата целосна поддршка за Северна Македонија и сме подготвени да ги прошириме нашите напори за зајакнување на тековните активности, како одговор со цел заштита на животот и егзистенцијата на луѓето.“, изјави д-р Фабио Скано.
Тој истакна дека Македонија била добар пример во Европа, за тоа како се справува со Ковид-19 и верува дека ситуацијата со заразата повторно може да се стави под контрола. Во однос на олабавување на мерките, д-р Скано рече дека секоја држава презема такви олабавување, но дека е битно рано да се идентификуваат позитивните на коронавирусот.
J. Ѓ.
