Премиерот Оливер Спасовски оцени дека отсуството од второто соочување од страна на неговиот противкандидат во ИЕ 2 од редовите на ВМРО-ДПМНЕ Владо Мисајловски, кој требаше да се случи вечерва, е потврда дека „концептот на опозицијата е режимот“.
-Вечерва сметав дека заедно со Мисајловски ќе бидеме да ги соочиме аргументите на ниво на концепти, тоа што не дојде и на оваа дебата дава за право да констатираме дека продолжување на режимот е нивниот концепт и претходно бегаа од дебата и соочувања и сега тоа го прават, рече Спасовски, на гостување во емисијата „Само вистина“ на ТВ Канал 5.
Според него, ако имавте 11 години во кои што избегнуваа на кој било начин да се соочат со кој било претставник на тогашната опозиција за да видиме што е добро во државата, а што е лошо, кои се визиите и концептот за оваа држава, сега, вели, кога имаме држава која што стана членка на НАТО која ги отвора преговорите со ЕУ, во која сите сме слободни, владее демократија поголема е обврската на секој од политичарите да дебатира и на основа на концепции и програма да им понудиме на граѓаните да изберат.
-Затоа ние со право велиме дека на овие избори нема избор. Едната опција е коалицијата Можеме предводена од СДСМ која што гарантира една јасна перспектива, јасна визија за тоа што е направено до сега, меѓутоа и јасна перспектива каде треба да се движи државата. И второт е сигурно опасност, враѓање назад, во режимот, рече Спасовски.
Според известувањето дојдено од ВМРО-ДПМНЕ, како што беше кажано во емисијата, отсуството на Мисајловски од вечерашната дебата било поради партиски обврски.
Во однос на можноста од нови рестрикции поради корона кризата, Спасовски оцени дека нема основ за тоа и дека доволно е да се почитуваат мерките.
-Има опаѓачки бројки во врска со бројот на заболени. Ние сме многу транспарентни, не е променет алгоритмот и таа политика ќе продолжиме да ја водиме. Носиме мерки да помогнеме да не се шири вирусот, работиме на свеста на граѓаните за почитување на мерките. Немаме основа да носиме драстични рестриктивни мерки. Таквите мерки дадоа резултати, сега мерките се таргетирани. Потребно е почитување на мерките, носење маска и држење дистанца, вели Спасовски.
Тој кажа и дека лидерот на опозицијата Христијан Мицкоски покажал несериозност, со, вели, одењето во теретана, во ресторан, кога тоа не беше препорачано.
-Важно е да сме одговорни. Дали ние бевме во теретана или ресторан? Ние сме работно ангажирани и тоа е сосема друго, рече Спасовски.
Порача и дека гласањето е безбедно и оти е многу важно граѓаните да излезат да гласаат и да изберат Влада која ќе се справува со здравствено-економската криза
-Ја имаме оваа здравствена и економска криза која ќе трае. Се виде во минатото колку е важно да имаме функционални институции. Собрание кое ќе носи одлуки, ќе менува закони, ќе има контролна улога. Многу е важно граѓаните да ја преземат и судбината и одговорноста во свои раце за Владата која во следните четири години ќе се справува со кризата. Не можеме постојано да функционираме во вонредна состојба. Протоколите се направени, заштитните средства се обезбедени од државата. Денеска во ДИК е направена и симулација како ќе изгледа гласањето, тоа е сосема безбедно по здравјето и животот на граѓаните. Ништо не е побезбедно да одите во продавница, банка, пошта, автобус, вели Спасовски.
Тој ги повика сите граѓани да излезат и да гласаат, да носат заштитна опрема и да ѝ помогнат на државата со тоа што ќе гласаат./МИА/
