Асоцијацијата на архитекти (ААМ) објави дека тие се за зачувување на Универзалната сала, а предлогот за нејзина „преселба“ го дале затоа што градот утврдил дека има потреба од поголема концертна сала.
Според нив, на сегашната локација не може да се изгради поголем објект од постојниот, како што барал Град Скопје.
„По скорешните написи во медиумите во врска со Универзална сала, сакаме да Ве информираме дека ААМ во Декември 2019 година беше контактирана од страна на Град Скопје за организирање на конкурс за нова Универзална сала со проширена програма кој соодветствува на програмата која ја имаше конкурсот од 2013 год. каде беше предвидена изградба на обејкт од 36.000 м², во согласност со постојниот Детален урбанистички план – ДУП Буњаковец 2. Од наша страна беше посочено дека на дадената локација објект со толку обемна програма е несоодветно да се постави, што најдобро се покажа токму со конкурсот од 2013 година. Нашиот став беше дека Универзална сала треба да остане во целост таква каква што е и да се реставрира во нејзиниот постоен облик и појавност. Од страна на Град Скопје бевме информирани дека средства за реставрирање и реновирање на постојниот објект на Универзална сала нема. Добиените информации беа дека Град Скопје има утврдено дека Скопје има потреба од поголема, современа концертна сала, со нова програма“, стои во објавата на ААМ.
За асоцијацијата, она што останува како факт е дека постојниот објект на салата е во многу лоша состојба и не функционира повеќе од 5 години со што овој исклучително значаен јавен простор во центарот на градот не ги користи ресурсите на местото.
„Меѓутоа исто така е факт и дека објектот на Универзалната сала претставува идентитетски топоним во кој е вградено огромно количество од културниот седимент на градот кој е составен од бескрајната низата настани одржани во изминатите 50 години. Од причина што бевме информирани дека Градот нема средства за реконструкција на Универзална сала, предложивме просторот каде што е сместена Универзална сала да прерасне во јавен простор кој што ќе биде дефиниран по распишување на анкетен конкурс со што би се добиле идеи за негово идно функционирање и планирање“, велат од ААМ.
ААМ тврди дека предложиле новата Универзална сала, со бараните спецификации во конкурсот од 2013 година (објект од 23.000 м2), да се гради на друга соодветна локација. Како можна локација навеле простор во близина на Спортскиот центар „Борис Трајковски“, која е во непосредна близина на центарот на градот, содржи постојна инфраструктура и е во државна сопственост.
Тие го повикуваат градот да ги презентира во јавноста сите наоди за овој објект, а доколку нема пари, повик упатуваат и кон Владата за да помогне во реконструкцијата.
