Никола Димитров, кој во идната Влада ќе биде вицепремиер за европски прашања, во неговото обраќање на Фејсбук, вели дека во изминатиот мандат, му бело чест што како министер за надворешни работи бил дел од историскиот пробив со членството во НАТО и зеленото светло за преговори со ЕУ.
Тој истакнува дека ги зацврстивме државноста, темелите и безбедноста на нашата Македонија, Северна Македонија и го отворивме патот за европските стандарди да ги донесеме дома.
– Сакам јавно да им се заблагодарам на сите вработени и соработници во Министерството за надворешни работи, но и на сите вам кои ми дававте поддршка и мудрост кога ми беше најтешко. Човек е силен и способен толку колку што му се силни и способни тимот и пријателите, нагласува Димитров.
Димитров потенцира дека токму на патот што допрва нè чека сплотеноста ќе биде клучна.
– За мене, како човек кој целиот професионален живот го посвети на оваа идеја нема поголем предизвик од тоа да го водам најсуштинскиот и најважен државен процес. Ова е мојата должност, но и должноста на нашата генерација – да ги зацртаме чекорите, да ги впрегнеме најспособните и под светлото на процесот од ден на ден да се менуваме, рече Димитров.
Во своето обраќањем Димитров му се заблагодарува на идниот премиер Зоран Заев и на СДСМ за довербата да биде номиниран за вицепремиер задолжен за европски прашања и ветува дека од првиот ден ќе даде сè од себе за успешно да ја зграпчиме оваа историска шанса.
– Одиме напред и ќе бидеме светол европски пример. Одиме напред, таму каде припаѓаме! – вели идниот вицепремиер задолжен за европски прашања, Димитров.
Ј. Ѓ.
