– Почнавме со интензивни подготовки за процесот на вакцинација од ковид-19, го спремаме здравствениот систем за ефикасен начин на вакцинација, истакна министерот Филипче на вчерашната прес-конференција.
Тој наведува дека се обезбедени 833 илјади вакцини за 400 илјади граѓани преку КОВАКС механизмот. и додава дека покрај овој механизам, веќе се доставени барања за директни договори за вакцини до две светски компании Астра Зенека и Фајзер. И третиот механизам е механизмот кој го понудија дел од земјите членки на ЕУ.
„Вакцинацијата ќе се врши во вакциналните пунктови и болниците. Вакцинацијата ќе биде бесплатна за граѓаните и нема да биде задолжителна.
Ќе се спроведе брз процес на тренинг за вакцинирање, согласно спецификите на вакцините од Ковид-19.
Сите здравствени работници ќе бидат соодветно обучени, за сите овие вакцини коишто се сега на располагање здравствените работници веќе имале искуство од други вакцини коишто се со сличен тип. Вакцинацијата на специфични групи и здравствени работници ќе се врши во рамките на јавно-здравствените установи кадешто тие работат.
Добивме потврда од Американска фондација за потребни фрижидери на минус 70 степени и тие ќе стигнат на почетокот на јануари. Тие ќе бидат дел на овој систем на чување и дистрибуција на вакцините во државата.“, рече Филипче.
Министерот потенцира дека како приоритет ќе се вакцинираат сите здравствени работници кои работат во ковид центрите или се директно изложени или работат со заболени или суспектни. Понатаму, здравствени работници коишто работат со земањето на брисеви, граѓаните над 65 години, пациентите со хронични болести во делот на хронично белодробни и кардиоваскуларни болести според шифрите на дијагноза преку системот Мој Термин, како и вработените во критичната инфраструктура и транспорт.
Како што појасни д-р Александра Грозданова, претседателка на Комитетот за имунизација при Министерството за здравство, правилото за примање вакцина како за сите други вакцини така и за ковид вакцината – се прима во општа добра здравствена состојба.
Пациенти кои прележале ковид, во зависност од состојбата во која што се наоѓаат и временскиот период секако дека ќе можат, доколку сакаат, да ја примат ковид вакцината, но имајќи предвид дека ќе имаме приоритетна листа ќе треба на некаков начин да се приоретизираат токму тие категории, вели Грозданова.
Според Министерството за здравство вчера во ковид центрите во болниците низ земјава е пријавено дека се лекуваат вкупно 843 пациенти позитивни и суспектни на коронавирусот. Вкупниот број на пациенти позитивни и суспектни на коронавирусот кои се лекуваат на инфективните оддели во главниот град и во болниците низ земјава е 1.286 и има околу 160 празни болнички кревети во ковид центрите.
Во болницата во Битола се хоспитализирани 79 пациенти позитивни и суспектни на Ковид-19, а во болницата во Штип се хоспитализирани 65 пациенти. На инфективното одделение во Тетово има 39 пациенти, во Велес се лекуваат 57 болни, а во Куманово 116 пациенти позитивни и суспектни на Ковид 19. Во ковид центарот во Охрид има хоспитализирано 105 пациенти, во Прилеп 123, во ковид центарот во Гостивар 61, а во Струга 36 болни. Во болницата во Струмица хоспитализирани се 68 пациенти, во Кочани 18, во Кичево 20, Кавадарци 39, а во Гевгелија 17 лица позитивни и суспектни на коронавирусот. Од МЗ потенцираат дека сите одделенија на клиничките болници располагаат со болнички места до кои има довод на кислород.
Последните денови се забележува благ пад на новозаразените. Во последните 24 часа се направени 2.824 тестирања, а регистрирани се 1.100 нови случаи на Ковид-19.
Ј. Ѓ.
