Државната комисија за спречување на корупцијата (ДКСК) на денeшната прес-конференција информираше за случаите за договорот за консултантски услуги на градоначалникот Шилегов со неговата адвокатска канцеларија, а се осврна и на именувањето на вд. директорот на Агенцијата за филм Лазаревски.
„Шилегов го раскина договорот со адвокатското друштво откако му укажавме дека има судир на интереси. Шилегов сега нема договор со адвокатското друштво и не постои повеќе состојба на судир на интереси и нема дело за постапување. Ако пак Градот Скопје има склучено договор со таа консултанска куќа, тоа дополнително ќе го провериме и испитаме, истакна претседателката на ДКСК Билјана Ивановска,
ДКСК оцени дека е спорно именувањето на в.д. директорот на Агенцијата за филм на 15 декември 2020 година од страна на Владата.
„Спорно е тоа што лицето е истовремено член на управниот одбор на Агенцијата за филм. Има неспоивост на двете функции. Прво треба да се разреши лицето како член на управен одбор, па потоа ќе може од страна на Владата да биде именуван како директор., појасни Владимир Георгиев, член на ДКСК на денешната прес-конференција.
Тој истакна дека оваа оценка е донесена согласно Законот за спречување корупција и судир на интереси и затоа ДКСК на овој начин превентивно делува и и укажува на Владата, а можеби и на денешната седница, како што рече, да го разреши ова лице од член на УО доколку смета дека тоа лице треба да ја врши должност в.д. директор на Агенцијата за филм.
Претходно новоназначениот в.д. директор на Агенцијата за филм, Бојан Лазаревски во телефонска изјава за Фронтлајн изјави дека поднел барање за оставка од Управниот одбор на истата институција и дека се чека конечната одлука на Владата. Според Лазаревски, одлуката ќе биде соопштена многу скоро, веројатно на следната владина седница, најверојатно во понеделник. Во секој случај, неговата оставка не е спорна, прашање е на нејзиното службено процесирање.
Ј. Ѓорѓиоски
