Министерот за внатрешни работи Оливер Спасовски денеска престојуваше во Охрид каде присуствуваше на презентација на новата опрема обезбедена за потребите на Полициската станица за граничен надзор „Охридско Езеро“ (Езерска полиција).
Станува збор за пет пловни објекти со комплетна опрема, од кои четири патролни глисери со цврсто корито и кабини, со моќност од 200 и 160 коњски сили и еден гумен чамец со вонбродски мотор за надзор и обезбедување на Охридското Езеро и државната граница со Република Албанија.
– Ова е набавка направена за првпат после 20 години. Уште еден пример за посветеноста за комплетно опремување на полицијата, обезбедување максимални услови за работа на полициските службеници, што носи подобри резултати односно поголема безбедност на граѓаните, рече Спасовски, изразувајќи благодарност до Чешката Република која обезбеди половина од средствата за набавка на пловните објекти.
Спасовски истакна дека тоа е само дел од она што раководството на МВР го прави за подобрување на условите за работа на полицијата. Тој потсети дека се набавуваат нови униформи и опрема за полициските службеници, а се работи и на реновирање на полициските станици.
– Во тек е реконструкција на ОВР Кавадарци, Крива Паланка, Гевгелија, Регионалниот центар „Југ“ и полициската станица „Битпазар“. Очекуваме за скоро време сите тие објекти да бидат завршени, практично оваа 2020 година да бидат заокружени градежните зафати. Пред два дена ја исплативме бонус-платата за 2017 година, а наредните месеци ќе се исплатат бонусите и за 2018 и 2020 година, посочи Спасовски.
Истакна дека со обезбедување на подобри услови за работа за полициските службеници се добива поголема безбедност на граѓаните, на што укажуваат намалениот број сообраќајни незгоди, големите количини запленети дрога, оружје, пиротехника….
Министерот за внатрешни работи најави дека наредната година е предвидена и набавка на софистицирана опрема за контрола и заштита на просторот на и околу Охридското Езеро.
– Проектот предвидува целосно техничко покривање на просторот со термички камери, возила со специјална опрема што ќе ја обезбедуваат границата на начин како што тоа е направено на границата кај Гевгелија и Дојран, рече Спасовски.
