Министерот за животна средина и просторно планирање Насер Нуредини, градоначалниците на Град Скопје, Бутел и Шуто Оризари Петре Шилегов, Велимир Смилевски и Курто Дудуш денеска ја посетија депонијата во Визбегово, каде почнаа активностите за нејзино чистење.
Министерот Нуредини истакна дека се работи за чистење на една од најголемите еколошки закани на Скопје, која посебно во зиме влијае на почвата и на квалитетот на воздухот.
-Свесни за тоа, со ребалансот на буџетот, Министерството побара средства за справување и чистење на депонијата во Визбегово во вредност од 20 милиони денари за да помогне во санација на оваа локација, рече Нуредини, додавајќи дека работат интензивно. Потсети дека пред два дена во Владата беа усвоени пакет на шест комплетно нови закони за управување со отпадот, а се работи и на обезбедување средства за инфраструкатура за собирање, преработка и третман на отпад и градење стандардизирани регионални центри и депонии.
Градоначалникот Шилегов најави дека почна расчистување на еден од повеќедецениските еколошки проблеми во Скопје – депонијата во Визбегово, која е на граница меѓу општините Бутел, Шуто Оризари и Чучер-Сандево. Депонијата, според него, влијае на загадувањето зошто често била предмет на самозапалување или била палена од страна на несовесни граѓани.
-Денешната акција е доволен доказ како извонредната соработка што можат да ја остварат централната и локалната власт може да резултира конечно со решавање на ваквите проблеми, нагласи Шилегов на денешната прес-конференција. Изрази благодарност до Владата и до Министерството за животна средина и просторно планирање.
Тој очекува дека во следните 30 дена ќе биде исчистена оваа површина од околу 10 хектари, а треба да бидат фрлени над 50.000 метри кубни комунален смет и шут, да се израмни и да се заштити подрачјето и од депонија да прерасни во зелена оаза. Шилегов потсети дека Град Скопје годинава спроведуваше вакви акции во повеќе скопски општини, како во Ѓорче Петров, во населбата Мичурин во Опшптина Аеродром и во Кисела Вода.
-Дојдено е до здружување на инспекциските и редарските служби на Градот и општините и понатаму нема да има никаков вид толерирање за несовесните граѓани кои го фрлаат отпадот, особено на вакви точки. Мојот апел до граѓаните на Скопје е да го чуваме нашиот град како да е нашиот голем дом. Онака како што сакаме дома да ни биде чисто, така да се однесуваме и кон градот и совесно да се однесуваме кон комуналниот отпад и шутот, нагласи Шилегов.
