Социјалната мрежа „Фејсбук“ со новиот редизајн ја отстранува опцијата „лајк“ од страниците на брендови, јавни личности и уметници, се вели во соопштението објавено на блогот на компанијата. Отсега па натаму, фокусот ќе биде само на следбениците, пренесува „Мета.мк“.
„Ги отстрануваме лајковите и се фокусираме на следбениците за да го поедноставиме начинот на кој луѓето се поврзуваат со своите омилени страници“, информираат од „Фејсбук“ за редизајнот.
На Фејсбук страниците ќе бидат прикажани само следбениците и ќе имаат наменски „Њуз фид“, каде што корисниците ќе можат да се приклучат на разговори, комуницираат и да стапат во контакт со обожавателите.
Како што велат од компанијата, и натаму ќе биде достапен синиот беџ за потврда на профил, со цел полесно идентификување на објавите и коментарите од автентични страници и профили.
„Сакаме Фејсбук да биде безбедно место за поврзување со обожавателите, затоа ја подобривме нашата можност за откривање активност што не е дозволена на нашата платформа, вклучувајќи говор на омраза, насилна, сексуална или спам содржина и лажно претставување“, велат од Фејсбук, од каде што додаваат дека коментарите со син беџ ќе бидат во повисокиот дел од коментарите.
