Има различни групи пациенти кај кои е индициран лекот Ивермектин. Тоа се три групи пациенти – едни за превенција, други кои биле во контакт со заболен од Ковид-19 и третата група на пациенти кои се заболени. Тоа е лек што ја намалува репликацијата на вирусот и не го суплимира имуниот одговор на клетката и практично тие резултати се многу бргу видливи после апликацијата. Битно е да не се зема на своја рака исклучиво со препорака и лекарски рецепт.
Ова денеска го истакна министерот за здравство Венко Филипче, кој рече дека има се повеќе количини од тој лек и ќе има доволно количини.
– Лекот си има свои препораки и свој протокол. Во нашата земја препораките се од стручните колегиуми на клиниките. На почетокот за повеќе лекови и се уште важечки се протоколите и од Клиниката за инфективни болести и доколку ги погледнете истите се преземени од Србија, од Хрватска итн. Едноставно тие протоколи така функционираат и нема тука што да се додаде или одземе заради тоа што се однесува само на еден лек. Доколку има несакан ефект се знае каква е постапката и процедурата со пријавување на несаканиот лек во Агенцијата за лекови, проверка од каде е тој лек и за тоа има еднаква процедура со години наназад и не важи само за Ивермектинот, рече Филипче.
На новинарско прашање дали и кога лекот што е замена на лекот Клексан, а за кој пациентите плаќаат по околу 4.000 денари, ќе биде на товар на Фондот за здравствено осигурување, тој најави дека уште денеска ќе организираат состанок со претставниците на Фондот.
– Количините на лекот Клексан во декември практично ги удвоивме, од 4.500 скатули што месечно се трошеа на осум, сега се целосно снабдени болниците и очекуваме овие денови да бидат снабдени и аптеките. Има и друга замена што не е од таа скапа орална терапија, меѓутоа ќе го разгледаме прашањето и за многу кратко време ќе одговориме. Нема да ги оставиме пациентите без лекови, тоа е сигурно, додаде Филипче. /МИА/
