пишува: ЏАБИР ДЕРАЛА
На МВРО (како што Гордана Јанкулоска си ја нарекуваше партијата) ништо не му е доволно. Му успеа, без посебен напор, да го задржи својот партиски војник на највисоката позиција во македонската ТВ Бастилја во 2018 година, но сега ни тоа не му е доволно. Марјан Цветковски, директорот на МРТВ од редовите на најпослушните партиски војници – груевисти, веќе не ги задоволува апетитите на „белата дивоградба“ и нејзиниот стопан во Будимпешта. Тие сакаат повеќе.
Цветковски е поставен за прв човек на јавниот сервис во 2012 година. Тивко пловеше низ директорските води во „најдобрите години“ на режимот на Груевски, а транзицијата на власта, сосе крвавиот напад врз Собранието на 27 април 2017 година, ја „прележа“ без симптоми. Програмскиот совет распиша конкурс на 26 јануари 2018 година и брзо го „избра“ повторно истиот директор со мандат од три години, се разбира, со право на реизбор.
МВРО очекува од „својот“ директор да ја гради програмата на истиот начин како за време на режимот, ако не и „појако“. Но поранешниот агитпроп послушник на Груевски, почна да покажува знаци дека станал „свој човек“. Затоа, по некое „чудо,“ тој сега стана непожелен за партијата. „Честа“ да ја изврши политичката егзекуција му припадна на Програмскиот совет на МРТВ, избран во декември 2014 година. Ако само малку се гребне на површината на оваа структура, ќе се забележи доминација на инсталацијата на Груевски, а тоа веднаш повлеквит и непотизам, корупција, партиски влијанија…
Акцијата на МВРО е едноставна. Програмскиот совет има задача да распише конкурс за нов директор и заменик-директор на МРТ. Целта е да се казни сегашниот директор поради недоволна партиска агилност, а воедно и да си обезбедат директор со мандат кој ќе биде тешко, односно неизводливо, да се прекине и со следниот состав на Програмскиот совет на МРТВ. Со еден удар, две муви. Планот им е итар, но не и доволно разработен.
Директорот не се дава, а на негова страна е и законот. Каков-таков, ама закон, тој истиот што се менуваше за да им го продолжи животот (мандатот), за мир во куќата или кој знае што. Впрочем, кога тоа законот бил проблем за инсталациите на режимот? Уште и среде ваква помирувачка демократија, цело време со „големата слика“ пред очите, повторното освојување на македонската ТВ Бастилја не би требало да биде проблем.
МВРО има уште една предност во овој нов скандал во зачеток. Јавноста веќе одамна се навикна на МРТВ да гледа како на лево сметало во медиумскиот простор. Затоа, МВРО е убедено дека и оваа офанзива на медиумскиот простор кој го плаќаат сите граѓанки и граѓани, а ќарот го собира само МВРО, ќе помине под радарот на јавноста.
Во име на политичкиот дијалог и помирување, во име на (по)големата слика и слични поголеми и помали, практични и залудни потези, јавноста, институциите, па и владејачкото мнозинство во Парламентот, преспаа дузина „операции“ на МВРО за дестабилизација и кочење на европската иднина на земјата. Има ли причина да станат од кревет за еден анонимен лик каков што е сегашниот директор на МРТВ? Па има само „скромни“ 15-ина милиони евра годишен буџет на располагање!
Програмскиот совет на МРТВ е посебна приказна. Ликовите кои се во партиско-фамилијарни спреги со МВРО доминираат во составот на ова тело, својствено на сите останати инсталации на Груевски, имаат навика да ги толкуваат законите на свој начин. Така, со истечен мандат, во јануари 2020 година, „ладно“ си распишаа конкурс за избор на членови на Надзорниот одбор. И сега, Програмскиот совет си прави конкурс за директор, иако со законските измени, мандатот им е продолжен на сите протагонисти на оваа ТВ сапуница, а не само на Грујовите „програмери“. Некој овде се прави наудрен или законите се како швајцарско сирење. Веројатно и обете.
Во меѓувреме, нашиот јавен сервис останува ТВ Бастилја, медиумски чир во кој, под иста опна, виреат сите официјални и неофицијални национализми преточени во лоша и здодевна програма.
Чекајте, а зошто не оставка токму на Програмскиот совет на МРТВ? Тоа би било чесен потег. Така и Собранието ќе ја забрза постапката, па целиот пакет – директор, заменик и Програмски совет – ќе го испратиме во историјата. Или барем инсталацијата на Груевски, бидејќи во Програмскиот совет има и супер професионални ликови од кои МРТВ може нешто и да научи. Но, можеби треба да почекаме за таков развој на настаните, имајќи ја (по)големата слика пред очите…
