„Патиштата во државата ни се врвен приоритет, инфраструктурата генерално. Затоа градиме нови модерни безбедни патишта и правиме реконструкции на старите. Експресниот пат Штип – Радовиш, тоа е целосно нова траса, покрај стариот пат. Очекувањата се дека првата фаза оваа пролет ќе биде завршена, а тоа е сериозно голема делница, втората фаза очекуваме да се заврши следната пролет, а ако можеме и до крајот на оваа година би било уште подобро. Штип – Кочани, исто така има две делници, веќе првата во должина од 14 километри е завршена, а втората, од Крупиште до Кочани, наскоро ќе се заврши. Ранковце до Крива Паналнкна е уште еден пат кој се гради. Сето ова е дел од Коридорот 8, а тоа значи поврзување со соседите, со источниот сосед. Ние инвестираме 100 милиони евра во овие патишта.“ изјави министерот за транспорт и врски, Благој Бочварски, во интервју за вестите на Сител.
Тој зборуваше и за другите проекти за подобрување на патната инфраструктура низ државата.
„Патот Градско- Прилеп е започнат одамна, имаше многу проблеми, но со задоволство најавувам дека, на правата делница, сите проблеми се надминати, работата ја презеде друга компанија и од пролет таму ќе има градежни активности. Тешка траса е ова, но ова е предизвик, и тој пат да добие друга динамика и да имаме побезбеден пат за нашите граѓани.“- дополни Бочварски.
