Вчера, претседателот Бајден потпиша претседателски меморандум со кој се упатуваат сите американски владини оддели и агенции ангажирани во странство да осигураат дека американската дипломатија и странска помош ги промовираат и штитат човековите права на лезбејките, геј мажите, бисексуалните, трансродовите, квир и интерсексуалните лица низ светот, соопштуваат од Американската Влада.
Борбата да се стави крај на насилството, дискриминацијата, криминализацијата и стигмата против ЛГБТИ+ лицата е глобален предизвик што останува клучен во новата американска заложба за унапредување на човековите права и основните слободи за сите лица. Во администрацијата на Бајден-Харис, Соединетите Држави ќе спроведат политика за ставање крај на насилството и дискриминацијата врз основа на сексуалната ориентација, родовиот идентитет или карактеристиките на полот. Вчерашната акција на Бајден ја покажува цврстата посветеност на американската влада за унапредување на оваа цел.
Согласно меморандумот на Бајден, Стејт департментот во координација со релевантните федерални агенции ќе користи широк спектар на дипломатски и програмски алатки и ресурси за заштита на ранливите ЛГБТИ лица, бегалците и барателите на азил, ќе помогне во борба против криминализацијата на поединците врз основа на статусот или однесувањето на ЛГБТИ лицата, и ќе се осигураат дека нивната дипломатија и странска помош ги промовираат и штитат човековите права на ЛГБТИ+ лицата и унапредуваат недискриминација. Се дозволува и брза реакција на САД против кршењето на човековите права и злоупотребите на ЛГБТИ + лица.
Работејќи со Конгресот, Стејт Департментот ги презема неопходните чекори за да обезбеди 10 милиони долари, средства за Глобалниот фонд за еднаквост (ГЕФ). ГЕФ им обезбедува итна помош на бранителите на човековите права и програмската поддршка на човековите права на основните ЛГБТИ+ организации за да ги катализираат позитивните промени, и ја црпи својата сила од поддршката и партнерството на меѓународната коалиција на истомисленици влади, бизниси и фондации.
Под раководство на Бајден, Соединетите држави ќе соработуваат со истомисленици на владите и ќе го зајакнат застапувањето на граѓанското општество за целосна поддршка и унапредување на човековите права на ЛГБТИ+лицата.
подготвила: Марија Миткоска
