Претседателката на Европската комисија, Урсула фон дер Лајен, повторно ги призна можните пропусти во набавката на вакцините, но истовремено отфрли дека тие биле нарачани предоцна и предупреди дека ЕУ уште денеска мора да се подготви за сценарио во кое вирусот веќе да не може да биде доволно потиснат од сегашните вакцини.
-Навремено да научевме за тешкотиите во масовното производство на вакцините, тогаш порано ќе ги намалевме преголемите очекувања за брза вакцинација на сите нивоа, рече Фон дер Лајан во авторскиот текст за „Франкфуртер алгемајне цајтунг“.
Таа истакна дека уште денеска е потребно да се подготвиме за сценарио во кое вирусот веќе нема да може да биде доволно контролиран од сегашните вакцини и додаде дека затоа ЕУ тесно соработува со науката и индустријата за што поскоро да се развијат вакцините против идните соеви на вирусот.
Како лекција од минатогодишните пропусти, таа порача дека под итно треба да се прошират производствените капацитети во Европа. Притоа додаде дека е непромислено да се мисли дека побрзото постигнување на договорите за вакцини ќе доведеше до побрзи испораки.
Според неа, проблемот е во сложениот процес на производство и недостатокот на важни состојки.
-Да, можеби е потребно подолго време за одлуките да бидат донесени од 27-те членки, призна претседателката на Европската комисија.
Таа рече дека Германија и другите земји можат да купуваат вакцини самостојно, но со можни последици за единството на Европа, заедничкиот пазар и просперитетот.
-Тоа би ги загрозило темелите на Европа, рече Урсула фон дер Лајен
