Градоначалникот на Општина Центар, Саша Богдановиќ, вели дека нивниот став е дека не треба да има мешање на децата од основно и средно образование. Реакцијата следува по написите дека дел од просториите во ООУ „Киро Глигоров“ кое се наоѓа во населбата Капиштец, ќе бидат изнајмени на приватна гимназија.
Од Општина Центар велат дека ги демнатираат тие информации и дека такво нешто нема да дозволат.
„Ставот на Општина Центар во однос на приватната гимназија во ООУ ‘Киро Глигоров’ е дека не треба да има мешање на децата. Овде изградивме ново, модерно, современо основно училиште, кое треба да биде пример, а не пречка во образовниот процес. Приватно средно образование во основно училиште нема да дозволиме“, вели градоначалникот на Општина Центар, Саша Богдановиќ.
Во соопштението се додава дека законските норми наложуваат дека Советот на општината нема надлежност да одлучува дали ќе има или нема да има гимназија во рамките на ова училиште, туку таа одлука може да ја донесе само училишниот одбор.
„Во училишниот одбор членуваат наставници од училиштето, советници од Советот и претставници на родителите на децата кои посетуваат настава во училиштето“, се додава во соопштението на Општина Центар.
