„Вчера ја примив првата доза. Одлично се чувствувам. Единствено почнува блага болка во рамото на местото на апликацијата.“, вели за ФРОНТЛАЈН Глорија Гашпар лекар на специјализација на неврологија, која во моментов е ангажирана во Ковид центарот на УК за Неврологија, а доаѓа од Специјализирана болница за геријатриска и палијативна медицина 13 Ноември Скопје.
Таа нагласува дека здравствените работници треба да се за пример и да предничат во вакцинацијата и смета дека вакцинирањето против Ковид-19 не треба да е избор, туку обврска на секој граѓанин.
„Сметам дека вакцинацијата не треба да е избор, туку обврска на секој граѓанин, во правец на заштита на сопственото здравје, а уште повеќе на здравјето на другите. Здравствените работници треба да предничат во вакцинацијата и да работат во прилог на подигањето на свеста кај граѓанството. Верувам во науката и имам полна доверба во безбедноста на платформите на кои се правени вакцините.“, вели Гашпар.
Специјализантката на неврологија лично преферирала да ја примам вакцината на Фајзер и апелира сите да се вакцинираат.
„Лично преферирав да ја примам баш Фајзеровата вакцина како иновативна и прецизна со испраќање на информација на мојот имун систем. Втората доза треба да ја примам на единаесети март. Испраќам апел до сите да пристапат кон вакцинација, затоа што вакцините во голема мера придонеле да ја очуваме врстата. Така е овој пат.“, вели д-р Глорија Гашпар за Фронтлајн.
Веќе два дена се одвива вакцинацијата во земјава. Се вакцинира првата група, здравствените работници, со вакцините од Фајзер, донација од Србија. Вакцинацијата се одвива во модуларната болница на Клиниката за инфективни болести и фебрилни состојби, а интерес за вакцинирање изразиле 70 отсто од здравствените работници.
Јане Ѓорѓиоски
