Премиерот Зоран Заев во објаснувањето зошто службено отпатувал со министерот за здравство со хеликоптер до Прилеп посочи дека Никола Груевски и функционерите на ВМРО ДПМНЕ кога биле на власт ги користеле хеликоптерите за приватни патувања, но тогаш никој не смеел да зборува за тоа, уште помалку да критикува.
Вистината е таа, хеликоптерите на МВР биле во постојана употреба, лично од страна на челниците на ВМРО ДПМНЕ, но и за промоција на нивната пропаганда. Јавноста памети дека во акцијата “Засади ја својата иднина“ кога ВМРО ДПМНЕ организираше садење дрвја низ државата, хеликоптерите летаа со новинарите на власта за да направат снимки од високо. Постојат видео материјали кои докажуваат дека новинарите – пропагандисти на ВМРО ДПМНЕ летале со хелокоптерите за позитивно да известуваат од еко- акцијата.
Тогаш задачата на партиските новинари беше позитивно да известуваат од акцијата со садење дрвја, иако новинарите истражувачи известуваа за криминал со садниците и пласираа податоци според кои акцијата се спроведувала многу повеќе за некој финансиски да профитира, отколку дека бил загрижен за животната средина. И не само за пропагандата, ВМРО ДПМНЕ ги користеше службените хеликоптери за личните потреби на функционерите, пред се на Груевски и Мијалков.
Иако помина подолго време, не може да се заборави дека во 2013 година година кога Груевски се соочи со незадоволство на граѓаните во Кичево пред партискиот штаб, и кога за малку беше избегнат поголем инцидент, тогашниот премиер го напушти градот со хеликоптер за што полесно да го избегне соочувањето со незадоволните граѓани.
Сашо Мијалков пак, дали со авион дали со хеликоптер патуваше до Прага и тоа многу често. И тоа приватно, ама на државна сметка. Во 2011 година СДСМ како опозицијата во јавноста објави 16 фактури испратени од скопскиот аеродром до МВР за да се плати користењето на ВИП салонот на аеродромот. На сите фактури стоеше името на Мијалков и беше утврдено дека во период од две години тој патувал дури 16 пати до Прага, но ниту еднаш службено.
На тие летови до Прага го придружувале различни лица од неговото опкружување, па некогаш патувала мајката на Груевски, Надежда Груевска, понекогаш Љупчо Тодоровски Радникот, телохранителот Ален Зекиров и други. Зошто овие лица го користеле ВИП салонот и го плаќале со државни пари? Зошто никогаш ниту една истражна институција не отворила случај и не проверила колку пари од народот се потрошени за летањето на Мијалков, Груевски и неговата мајка, како и на нивните соработници и како тоа плаќале летови и салони со пари на граѓаните, а остварувале лични потреби.
Е сега, во десетте години владеење на ВМРО ДПМНЕ, функционерите на партијата во безброј случаи летаа со хеликоптерите на МВР, ама тогаш немаше критичка јавност и медиуми кои ќе застанеа против таквото самоволие и неразумното трошење народни пари. Денес, кога медиумите стануваат слободни и независни, кога владата транспарентно објавува како се троши секој денар на граѓаните, кога секој медиум може слободно да постави прашање, премиерот беше под критика зошто го искористил хеликоптерот на МВР. И тоа така треба да биде, но аргументирано и исто како што им се даде медиумски простор на критиките, истиот простор мора да мус е дозволи и на Заев за да објасни зошто летал за Прилеп. А тој, објасни дека и хеликоптерот и пилотот мора во текот на годината да остварат часови со летање, што е нормално и логично, па еден од тие часови за пракса на пилотот и тековно одржување на леталото било дента кога премиерот и министерот отпатувале до Прилеп. На тој начин владата не потрошила ниту денар за патувањето, оти трошокот со хеликоптерот и онака би се направил ако пилотот летал и вежбал со празно летало.
Дополнително, функционерите заштедиле на време и можеле дента да реализираат погоем број обврски., Но, редовните критичари не гледаат вака на фактите, ним во агендата им е само да критикуваат, многу често неаргументирано. И секако, секогаш забораваат да направат споредба како беше некогаш како е сега. А разликата е голема и се гледа од хеликоптер.
Д. Е.