Филипче на својот фејсбук профил напиша декa на негово барање се сретнал со кинескиот амбасадор во државава, Џанг Ѕуо. На средбата разговаравме за испораката на вакцините од производителот „Синофарм“, односно да се забрза процесот за испорака на 200.000 вакцини, кои според најавите на амбасадата во нашата земја би требало да стигнат до крај на месецов, објави Филипче.
Откако Владата вчера ја објави листата на лица кои се тековно ангажирани преку авторски договори за специфични задачи кои не може да се обезбедат од редот на вработените, на социјалните мрежи започна диригирана хајка против лицата ангажирани хонорарци. Кога Апасиев зема хонорари, тогаш храни фамилија, а кога тоа го прави толкувачка на знаковен јазик, таа според него е мршојадец
Направен е исчекор околу законот за државјанство на средбата на премиерот Зоран Заев со лидерите на опозициската коалиција Алтернатива и Алијанса за Албанците Африм Гаши и Зијадин Села. Тој исчекор, како што оцени вчера премиерот би значел и можност за одблокирање на законите во Собранието, пред се од петтиот пакет мерки за помош на бизнисите и граѓаните, на кои пратениците од оваа коалиција имаат поднесено амандмани.
Хелсиншкиот комитет за човекови права подготви правно мислење во однос на бездржавјанството, со осврт на Законот за државјанството, Законот за странците и Законот за неевидентираните лица во матичната книга на родените. Доколку и со примената на постојните законски одредби статусот на лицата без државјанство не се уреди, тогаш државата треба да изнајде решенија за нив, стои во заклучокот од правното мислење на Хелсиншкиот комитет.
Цела недела не замараа со наводни скандали со тајни списоци на вработени во влада што работеле тајни пропагандни задачи. Денес излезе списокот и сите видоа дека нема ниту едно спорно име, особено не твитерџии и инфлуенсери за кои погодуваа дека за пари ја бранеле владата. Ете тие се денес гласните незадоволници од #ШаренаРеволуција, глумат дека се предадени, а од петни жили се обидуваа да ја саботираат додека траеше. Ќе им каже ли некој!?, пишува Никола Наумоски.
Шарената револуција беше ослободување на духот, пограѓанчување на масата, поместување на општеството во нова димензија, Настан во кој нацијата се самоосвести и самоотвори за нови перспективи на социјалниот, политичкиот и културниот развој… Извор на гордост на сите што учествувавме во револуцијата која го обедини општеството по сите основи, а најмногу во идејата за слободата и правдата. Но, причина за гордост и на сите граѓани, пишува Бранко Тричковски.
М. Миткоска