Ќе се пробива улицата Џон Кенеди низ ромската населба во Чаир за да се спои со булеварот Никола Карев или познатата Пластичарска улица.
„Пробивањето на оваа улица е дел од визијата и коридорите кои ги градиме во северниот дел од градот, со цел да овозможиме побрз проток на сообраќајот и пократко време за патување. Овој дел од Скопје со години бил запоставуван. Во моментов го прошируваме булеварот Никола Карев, работиме на улицата Македонско-косовска бригада и очекувам годинава да завршиме со проектирање на новата улица и догодина да стартуваат градежните работи. Со тоа ќе заокружиме една целина во овој дел кој години наназад е тесно грло“, вели градоначалникот на Скопје, Петре Шилегов, пренесува СДК.мк.
Град Скопје предвидува улицата Џон Кенеди да продолжува од крстосницата со улицата Македонско-косовска бригада до булеварот Никола Карев кај Американската амбасада. Улицата ќе се пробива низ ромската населба во Чаир за да се спои со Пластичарска улица.
За нејзина изведба триесетина куќи од ромското маало кои се наоѓаат од трасата ќе се урнат, а сопствениците ќе добијат обесштетување. Како што вели градоначалникот Шилегов, улицата ќе биде со четири коловозни ленти, по две во двата правци и ќе се овозможи брз проток на сообраќајот во овој дел.
