“Непречено и без никакви проблеми заврши полагањето на првиот екстерен испит од државна матура, се што беше постигнато како договор со Министерството за образование и наука беше испочитувано“, оцени Бленди Ходаи претседател на Сојузот на средношколци на Македонија.
Ходаи изјава за медиумите ја даде откако и самиот екстерниот испит на неговиот, мајчин албански, јазик го полагаше во Гимназијата „Кирил Пејчиновиќ“ во Тетово.
„И самиот се уверив дека сѐ што беше договорено се испочитува. И материјалот кој се предаваше преку онлајн настава не беше застапен во прашањата на државната матура, туку имаше материјал претежно од наставната програма која ни се предавала додека сме биле физички присутни во училиштата, а и тоа беше дел од нашето барање. Задоволни сме од тоа што го постигнавме и ова е навистина почитување на договор, а не како некои договори само се потпишуваат а не се реализираат во пракса“, изјави Ходаи.
Во средните училишта во Тетово денеска првиот испит од државната матура ја полагаа 1256 ученици. Тие беа најгласни и највеќе даваа поддршка на бојкотот на Сојузот на средношколци, преку кој се бараше промена на начинот на полагање на државна матура. Што со изгубениот материјал додека траеше бојкотот од Секторот за јавни дејности при Општина Тетово со одговор.
„После секој бојкот следуваат и тие процедури кои треба да се почитуваат, за надоградување или пополнување на оние работи кои што не беа реализирани за време на бојкотот. Тоа што ќе биде предложено од Бирото за развој на образование ќе биде испочитувано во нашите училишта“, рече Ахмед Ќазими раководител на Сектор за јавни дејности при Општина Тетово.
Ходаи вели дека голем дел од средношколците не се согласуваат и со овој концепт на полагање на државна матура. Договорен е нов заедно со надлежното министерство, а во процесот била вклучена и Светска банка.
„Институциите зад камера велат дека оваа матура е пародија, а во тој нов концепт ќе има повеќе предмети за полагање, за да го дигнеме квалитетот на образованието и исто така да се одвојат тие ученици кои сакаат да продолжат на факултет, рече Ходаи.
Новиот концепт на полагање на државна матура се очекува да започне по две години.
Зоран Димовски
