Фондот за иновации и технолошки развој (ФИТР) и УСАИД потпишаа Мeморандум за соработка со кој ја продолжуваат соработката за поддршка на претприемништвото и стартап бизнисите, зајакнување на капацитетите на приватниот сектор и зголемување на конкурентноста.
Заедничките активности, како што соопштија од ФИТР, ќе вклучуваат поддршка на инвестициите во технологија и развој на нови производи, поттикнување на меѓусекторска соработка и подобрен пристап до финансии за стартапи.
– УСАИД Македонија се наши долгогодишни партнери и поддржувачи на реформите во нашата држава, затоа ме радува што во наредните четири години ќе работиме на реализација на трите компоненти кои се приоритетни за економскиот развој на С.Македонија, односно подобрување на конкурентноста и продуктивноста пред се на стартап компаниите, создавање на атрактивни можности за вработување и привлекување на дигитално напредни млади да развиваат иновативни решенија на пазарот, истакна Коста Петров, директор на Фонд за иновации и технолошки развој.
Во рамките на Меморандумот предвидени се и активности за подобрување и зголемување на транспарентноста на јавните институции на централно и локално ниво. Поддршката се однесува и на овозможување поголема соработка меѓу Владата, граѓанското општество и деловните субјекти.
– Овој меморандум им овозможува на УСАИД и Фондот за иновации да работат заеднички кон остварување на повеќе заеднички цели. Стратешките цели на УСАИД во следните пет години се да се зголеми економската конкурентност и продуктивноста на микро, малите и средните претпријатија, да се помогне во создавање економски можности за младите и намалување на корупцијата. Во рамките на новата стратегија, УСАИД соработува со партнери кои се лидери во својата област, знаат да спроведуваат и инвестираат ресурси за развој. Фондот за иновации е таков партнер и очекуваме одлична соработка, рече Ерик Јановски, претставник на канцеларијата на УСАИД.
ФИТР и УСАИД веќе имаат Меморандум за соработка за продолжување на кофинансирање на програмите „Џуниор Ачивмент“, кои се фокусираат на поддршка на најталентирани креативци и стимулирање на развој на идни претприемачи. Во активностите на „Џуниор Ачивмент“ минатата година беа вклучени: над 150 наставници и над 500 ученици од гимназиско и средно стручно образование, а победничкиот тим на националниот натпревар на ученички компании имаше можност да се натпреваруваат со своите врсници на Европскиот натпревар во Португалија. Годинава ученици од 14 средни училишта од целата држава преку истата програма ќе добијат шанса да станат идни претприемачи, стои во соопштението од ФИТР.
извор: МИА
