Американскиот претседател, Џо Бајден, деновиве ја прими во официјална посета на Соединетите Американски Држави германската канцеларка, Ангела Меркел. Оваа средба на челниците на најмоќните држави од двата континента, испрати порака за сојузништво и обединетост во заложбите за демократските вредности и најверојатно е последна средба на Бајден и Меркел во својство на државници, по нејзиното долго најавувано повлекување од лидерските позиции во политиката, попарламентарните избори во Германија избори оваа есен.
Меѓутоа, она по што е особено актуелен овој период американскиот претседател, се и неговите изјави во однос на опасностите кои со себе ги носат дезинформациите. Имунизацијата на населението, како најпосакуван начин за справување со тековната пандемија, носи предизвици како за помалите земји, така и за поголемите. Американскиот претседател, упатувајќи порака до американските граѓани за продолжување со вакцинацијата, недвосмислено изрази и разочарување од големиот број на дезинформации кои се лиферуваат низ медиумите, но најмногу на социјалните мрежи. Граѓаните се буквално бомбардирани од нецелосни и невистинити информации, а Бајден оправдано вели дека „социјалните мрежи убиваат луѓе со дезинформации за вакцините“.
Белата куќа упати повик до големите оператори и компаниите кои ги водат социјалните мрежи, во кој се укажува на потребата од зголемена посветеност кон сузбивање на лажните вести за вакцините на овие мрежи, а особено во пресрет на експанзијата на варијантата Делта на корона вирусот. Токму спречувањето на разорното дејство на дезинформациите, кои ја дестимулираат имунизацијата на населението, останува да биде во фокусот на Бајденовата администрација.
Ќе се сложиме со важноста на ова, а секако, ситуацијата околу темава не е ни малку розова ниту во Северна Македонија. Континуираната борба против дезинформациите, лажните вести, но и манипулацијата со граѓаните преку алатките кои ги користат дезинформаторите, продолжува да биде еден од приоритетите на владата, како и на граѓанското општество и професионалните медиуми.
Тоа што го истакнуваат светските лидери, како и релевантните претставници на овдешните власти, медиумите и граѓанските организации е токму потребата од здружување на силите во борбата со дезинформациите.
Иван Дургутов
