Во ординацијата „Медико Марија“ секојдневно доаѓаат пациенти што се жалат на тегоби кои се типични за стомачен вирус, но подоцна се докажува дека всушност се работи за ковид-19, вели д-р Весна Стојанова – Атанасовска, доктор по општа и семејна медицина. Според она што во последниов период го забележала, сè повеќе на тегоби се жалат деца и тинејџери, за кои со тест се потврдува дека се ковид-позитивни. Само во текот на вчерашниот ден, за осуммина од нејзините пациенти се потврдило дека се позитивни, а од нив пет биле деца, информира МЕТА.мк.
„Ковид-случаите почнуваат да се зголемуваат кај нас, и тоа повеќе меѓу детската популација. Во летниот период има стомачни вируси и тоа е нешто што е нормално. Но ова лето, сега, се појавуваат и нови симптоми, кои се покачена телесна температура, затнат нос, малаксаност, па ние докторите често знаеме да направиме превид, мислејќи дека се работи за стомачен вирус и го третираме така. Сега наложив на неколку дечиња – мои пациенти, оние кои ми беа сомнителни, да се тестираат, по што се покажа дека се позитивни на ковид. Тоа беа оние кои немаа сила и покрај дадената инфузија и лек за температура, и оние кои чувствуваа слабост во целото тело. Само вчера, во еден ден, добив 8 позитивни пациенти, од кои тројца се возрасни и другите пет се дечиња. Четворица од нив беа тестирани со брз рапид тест, а другите со докажан ПЦР тест“, вели Стојанова – Атанасовска.
Еден од пациентите е тринаесетгодишно момче кое се заразило од братучетка му, која е дојдена од странство, а која исто така имала симптоми. Докторката вели дека момчето имало солиден имунитет.
„И покрај третирање два-три дена со инфузии и терапија, на момчето му се влоши дишењето и сега е во Козле, повремено го ставаат на кислородна маска. Тоа е дете со солиден имунитет и дете кое немало никакви болести. Инаку другите пациенти, се група млади, тоа се другари кои биле на „Охрид колинг“ и таму се заразиле. Од тоа што го гледам можам да кажам дека вирусот прави многу лоши клинички слики. И деца развиваат температура, се покачуваат де-димери“,- додава докторката.
Таа вели дека вчера во ординација имала пациентка на триесетгодишна возраст, која живее во Белгија, но е на гости во Македонија. Се вратила од летување во земјава со лет од Турција, а уште при престојот таму добила покачена температура, но не се тестирала.
„Кога дојде кај мене буквално не можеше да стои, немаше сила. Се тестираше и излезе позитивна. Мислам дека главниот проблем е во тоа што нема контрола на собирите, но и при летовите, на границите, во автобусите, не се знае кој влегува во нашата држава. Од друга страна е и личната неодоговорност, луѓето чекаат да колабираат, па дури потоа преземаат мерки и се тестираат“ вели таа.
Во однос на вакцинирањето, Стојанова-Атанасовска смета дека е потребна масовна вакцинација, но е на став дека деца не треба да се вакцинираат.
„Ми се јавуваат родители загрижени, велат дека нивните деца им тренираат ракомет и други спортови, па во клубовите ги обврзувале да бидат вакцинирани, а се работи за деца на 12, 13 години. Тоа се деца под 15 години, а тие, според мене не спаѓаат во група која би требало задолжително да се вакцинира“, додава докторката.
