Во моментов, во земјава има околу 1.000 пациенти кои се лекуваат од ковид-19. Најоптоварени се болниците во Тетово и Гоставар, делумно во Кичево. Најзастапена возраст на хоспитализирани е над 60 години, намалку застапени се децата. Хоспитализирани се околу 20 дечиња, генерално со полесна клиничка слика. Задржани се на болничко лекување поради внимателност, изјави на денешната прес-конференција министерот за здравство, Венко Филипче.
„Не е вистина дека пациентите не се лекуваат по протокол. Во секоја од болничките установи има соодветен протокол, препорака, терапија, индикација за терапијата. Нема унифициран пристап, зависи од тежината на клиничката слика. Клучен фактор е вакцинацијата. Бројот на починати вакцинирани е многу мал, што ја покажува ефикасноста на вакцината, а тоа е дека за 20 пати го намалува ризикот од смртен исход. Поголем дел од починатите имале и други заболувања како канцер, нерегулиран дијабет, срцеви заболувања, или имале повеќе хируршки интервенции“, изави Филипче.
Во однос на вакцинацијата, Филипче рече дека е задоволен од пристапот Владата и го смета за успешен.
„Имаме највисок просечен раст на вакцинирани во регионот. Искрено се надевам дека така и ќе остане. Трендовите се намалуваат, неколку денови по ред трае. Р0 факторот на преносливост е веќе под единица, или 0,9. Денеска има под 900 новозаразени, односно околу 880.
Целта на сите мерки е да се зголеми вакцинација, што и го постигнуваме, нагласи Филипче.
„Целта е да се зашитат граѓаните, здравствениот систем, а и државата. Секако нема контраиндикации од вакцинација и после еден месец од прележување на ковид-19“, изјави ресорниот министер.
Филипче потенцираше дека податоците покажуваат дека вакцинацијата е најдоброо решение за се врати стариот „нормален“ начин на живот.
И. Т. З.
