Ќе инсистирам на институционален пристап, точна анализа, проверка и секако разговор во однос на конкретното прашање за да ги изнесеме сите информации во јавноста, изјави министерот за здравство, Венко Филипче, во врска со посетите во модуларната болница за Ковид-19 во тетово, во која што при пожар синоќа животот го загубија 14 лица.
На денешната прес-конференција, министерот Филипче посочи дека посетите за ковид пациенти и во ковид одделенија во принцип се забранети насекаде.
– Еве сега со вакцинацијата има укажување од лекарите во Тетово дека со сертификати за вакцинација ги пуштале да ги посетат пациентите, не да ги чуваат, и со менаџментот на кадарот, и лекари, сестри, болничари и помошно-технички персонал, сето тоа е изменаџирано, како во рамките на секоја од болниците, така и во рамките на целата територија во државата, за што систем на ротација се прави помеѓу различни јавни здравствени установи, изјави министерот.
За конкретната ситуација, како што рече, конретна проверка на сите аспекти ќе направи Државен санитарен и здравствен инспекторат.
Во однос на прашањето дека дел од сведоците и роднините на хоспитализираните велат дека биле постојано таму за да им помагаат, да бидат придружба, Филипче одговори дека во секој момент обезбедувале доволно кадар насекаде.
На прашањето за разрешување на директорот на Тетовската болница, министерот посочи дека утврдувањето на одговорноста ќе го остави на истражните органи и на Инспекторатот. И, како што рече, никој нема да избегне од таа одговорност, доколку се утврди.
– Јас би ги почекал сите наоди да завршат од сите работи кои што ќе се истражуваат, изјави Филипче.
Министерот дополни дека апсолутно никој нема да избегне одговорност, и има повеќе аспекти кои што се истражуваат, а кога сето тоа ќе се анализира, ќе излезат со конечни ставови.
