Пладневен преглед: Јанчев – Моите бизнис релации со Тиквеш немаат врска со пласманот на грозје, не мислам дека цела Влада треба да даде оставка, вели Заев

Заев: Не знам до каде е истрагата, одлуката за Филипче ќе ја донесам врз основа на експертскиот извештај.

Заев: Позитивните трендови во економијата продолжуваат.  Во периодот од јануари-јули 2021 вкупната вредност на извозот изнесува скоро 4 милијарди евра и бележи раст од 34,6% во споредба со истиот период во 2020 година, напиша премиерот Зоран Заев на социјалните мрежи. „Само во јули 2021 година, во споредба со јули 2020 година растот е 13,2%.

За СДСМ, иницијативата која ја најави ВМРО-ДПМНЕ дека ќе поднесе предлог до Собранието за разрешување на Филипче, е голо политиканство. Премиерот Заев најави дека проценка и одлука по однос на поднесените оставките ќе ја базира исклучиво на фактите од истрагата, односно исклучиво согласно утврдените причини за избувнувањето на пожарот.

Куса историја на македонскиот политички (не)морал. Во својата 30-годишна демократска историја, Република Северна Македонија има релативно кусо, но значајна историја на дадени и понудени политички оставки. Кога ќе се види таа листа на функционери – сѐ до последниве од минатиот петок – прилично јасно се конституира „дијаграмот“ на (не)моралните подеми и падови кај главните политички формации во државава, од што секој може да си донесе свој заклучок, пишува во најновата колумна Сашо Орданоски.

 

ДЗС: Попишани вкупно 419.485 лица, 129.614 домаќинства и 173.439 станови. Пописот на населението, домаќинствата и становите во Република Северна Македонија, кој официјално започна на 5 септември ќе трае до 30 септември.

Драстично намалени водостоите на повеќето реки, Преспанско Езеро 11 сантиметри под апсолутниот минимум. Охридското Езеро е исто така под просекот. Кај нивото на Дојранското Езеро нема промени.

Завршуваат третата и четвртата фаза од реконструкцијата на улицата „Орце Николов“. Во овие две фази стариот и оштетен коловоз е заменет со нов, високо-квалитетен асфалт, реконструирани се тротарите, изведени се нови велосипедски патеки и изведено е паралелно паркирање. Поставено е ново, енергетски ефикасно ЛЕД осветлување, изведена е нова водоводна и атмосферска канализација, а обновена е и топлотната мрежа.