Економската активност во земјава расте и во услови на пандемија, а приватните инвестиции, како оваа, се потврда за довербата што ја градиме со бизнис заедницата и за предвидливиот, стабилен деловен амбиент за вложувања, рече премиерот Зоран Заев по посетата на фабриката „One cable“ за производство на кабли во индустриската зона „Сарај“.
Како што истакна Заев, се работи за инвестиција од три милиони евра која моментно вработува 30 висококвалификувани кадри.
„One cable“, истакна Заев, инвестира во современо производство на кабли за домашниот пазар, но и за извоз, а своите производи веќе ги пласираат во неколку земји.
-Продолжуваме со посветена работа и добри економски политики. Инвестициите, вработувањата и повисоките плати го менуваат животот на граѓаните. Оваа инвестиција, на „One cable“, е охрабрена токму од поддршката што ја дава Владата, подвлече премиерот.
Со него на промоцијата на инвестицијата се и првиот заменик-претседател и министер за политички систем и односи меѓу заедниците Артан Груби, министрите Фатмир Бесими и Крешник Бектеши, градоначалниците Петре Шилегов и Беџети.
Пред присутните се обрати и лидерот на ДУИ, Али Ахмети.
„One cable“ произведува бакарни кабли и ПВЦ гранулат за електрична енергија со најмодерна технологија.
