Редовниот политички барометар на агенцијата „Брима“ за политичките ставови на населението во Република Северна Македонија во пресрет на локалните избори во државата е теренско истражување, спроведено во периодот од 27 август до 9 септември годинава на национално репрезентативен примерок (анкетата е направена според методот лице-в-лице, во домот на испитаникот), со запазаување на сите демографски карактеристики на популација од 18+ години во државата, во која се опфатени 1.201 испитаници. Резултатите се со маргина на грешка од +/- 2,8% , екклузивно објавува Слободен печат.
Што се однесува до рангирањето на главните проблеми со кои се преокупирани анкетираните, од добиените анкетни податоци е очигледна тенденцијата граѓаните високо на првите места да ги третираат социјалните и економски теми. Така, кумулативно гледано, според рангирањето на изборот на неколкуте најважни проблеми од над 50 наведени можности, во моментов 31,5% од анкетираните спонтано ја истакнуваат невработеноста; состојбата со пандемијата е втора по важност со 26% од кумулативните одговори, по што следуваат економската ситуација (23,8%) и сиромаштијата и нискиот животен стандард (22%).
Со значајно заостанување во рангирањето, следуваат проблемите од сферата на нискиот квалитет на државните услуги, распростанетоста на корупцијата и криминалот и иднината на младите.
Во анкетата, долгиот низ на политичките проблеми (како што е општата политичка ситуација и „зачувувањето на македонската држава“ или можноста од бегалска криза, проблемот со Бугарија, меѓуетничките односи, протестите и контра-протестите и тн.) се далеку вон фокусот на грижите на анкетираните. За жал, во темите кои се нискорангирани се и проблемите со состојбата во животната средина и екологијата.
Извор: Слободен печат