Градоначалникот на Берово, Звонко Пекевски, очекува поддршка од советниците за иницијативата за преименување на улица во Берово во чест на прерано загинатиот словенечки пожарникар Жан Кофол, кој беше меѓу најмладите доброволци кои пристигнаа од Словенија и со денови учествуваше во гасењето на огнената стихија во околината на Берово и Пехчево.
– Иницијативата, која ја поднесов за преименување на улица „20” во населбата Ширината, во улица „Жан Кофол”, утре, ќе се најде на разгледување пред Советниците, на третата Седницата на Совет на Општина Берово, наведува во својата објава на Фејсбук градоначалникот Пекевски.
„Очекувам поддршка од советниците, а понатаму постапката за промена, ќе се врши согласно Законот за определување на имиња на улици, плоштади, мостови и на други инфраструктурни објекти.
Иницијативата ја поднесов за постхумно одликување, по името на овој хуман херој, кој загина во сообраќајна несреќа, а кој даде свој придонес во гаснењето на пожарите кои беснееја во Малешевијата.
Сметам дека именувањето на улицата, ќе значи за семејството на прерано загинатиот пожарникар, а од друга страна, ние како општина постхумно ќе искажеме признание и благодарност за поддршката која што ја даде Кофол за Берово и Малешевијата.
Почит треба да биде искажана на оние кои ја заслужиле!
Се надевам дека Советниците едногласно ќе ја прифатат оваа моја иницијатива и името и делото на овој млад пожарникар, никогаш нема да се заборави.
Жан Кофол го загуби животот во сообраќајна несреќа во близината на Нова Горица, на 28 септември, еден ден пред неговиот 20-ти роденден.
Кофол беше меѓу најмладите доброволци кои пристигнаа од Словенија и со денови учествуваше во гасењето на огнената стихија во околината на Берово и Пехчево.“, истакнува градоначалникот Пекевски.
Ј. Ѓ.