Американските научници кои ги создадоа првите живи роботи велат дека формите на живот, познати како ксеноботи, сега можат да се репродуцираат на начин што не е виден кај растенијата и животните, пишува CNN, пренесува Блиц.
Формирани од матичните клетки на африканската канџeста жаба (Xenopus laevis), по која се именувани, ксеноботите се широки помалку од еден милиметар. Ситните грутки првпат биле откриени во 2020 година, откако експериментите покажале дека можат да се движат, да соработуваат во групи и да се лекуваат.
Сега, научниците кои ги развиле на Универзитетот во Вермонт, Тафтс и Институтот Вајс на Харвард, рекоа дека откриле сосема нова форма на биолошка репродукција различна од кое било животно или растение познато на науката.
„Бев воодушевен“, вели Мајкл Левин, професор по биологија и директор на Центарот за откривање Ален на Универзитетот Тафтс, кој е коавтор на новото истражување.
-Жабите имаат начин на размножување кој обично го користат, но кога ќе ги ослободите (клетките) од останатиот дел од ембрионот и ќе им дадете шанса да разберат како да се најдат во нова средина, не само што разбираат и нов начин на движење, но очигледно нов начин на репродукција, истакна тој.
Робот или организам?
Матичните клетки се неспецијализирани клетки кои имаат способност да се развијат во различни типови на клетки. За да направат ксеноботи, истражувачите зеле живи матични клетки од ембрион на африканска жаба и ги оставиле да се инкубираат. Немало манипулација со гени.
„Повеќето луѓе мислат дека роботите се направени од метал и керамика, но не е толку важно од што е направен роботот туку што прави тој, а тоа е да дејствува независно во име на луѓето“, вели Џош Бонгард, професор и експерт за роботика. на Универзитетот во Вермонт и главен автор на студијата.
– На тој начин се работи за робот, но јасно е и дека организмот е направен од генетски немодифицирана клетка од жаба – додаде тој.
Научниците открија дека ксеноботите, кои првично биле во сферична форма и направени од околу 3.000 клетки, можат да се реплицираат. Но, тоа се случува ретко и само во конкретни околности.
Миткоска Марија