Крим и некои региони на Доњецката и Луганската област дефинитивно ќе се вратат под контрола на Украина, дома. Тоа е прашање на време. Не постои единствен „рецепт“ за враќање на териториите на Украина привремено окупирани од страна на Русија, но ние се стремиме да го решиме овој проблем на политичко-дипломатски начин, вели во интервју, амбасадорката на Украина во Република Северна Македонија, Наталија Задорожњук.
Според Задорожњук, Украина презема мерки, преку дипломатски канали да ги врати териториите заземени од Руската Федерација – Крим и одредени региони на Доњецката и Луганската област.
„На 29 септември 2021 година, Владата на Украина го одобри Акциониот план на Стратегијата за деокупација и реинтеграција на Крим, кој на 24 март Претседателот на Украина, Володимир Зеленскиј, го стави во сила. Националната стратегија за деокупација и реинтеграција на Крим е првиот задолжителен и темелен рамковен документ кој ги поставува клучните принципи, пристапи и насоки на работата на државата за ослободување на полуостровот. Акциониот план содржи 158 точки во десет делови: „Заштита на човековите права и слободи“, „Правна заштита на граѓаните и правните лица на Украина“, „Меѓународна соработка“, „Зајакнување на националната стабилност“, „Одбрана и безбедносна политика“, „Карактеристики на јавната политика за обезбедување на деокупација на Крим“, како и делови за економски, социјални, хуманитарни, еколошки и информативни политики. Властите ќе ги преземаат овие мерки сè додека Русија не го напушти полуостровот, вели Задорожњук.
Амбасадорката рече дека на 23 август 2021 година била создадена „Кримската платформа“, која е клучна алатка за деокупација и реинтеграција на Крим на меѓународно политичко ниво, консолидација на меѓународните напори за деокупација на Крим.
„Русија се обидува да му наметне на светот наратив за конечноста на статусот на Крим како дел од Руската Федерација. Оваа вештачка „нова реалност“ грубо ги нарушува основните принципи на меѓународното право, но поради постојаната употреба на притисок, лаги, уцени и поткупување, Русија не ги напушта напорите да го отстрани прашањето за Крим од светскиот дневен ред. Кримската платформа е заштита од овие дезинформации и ја зацврстува консолидираната позиција за тоа, дека Крим е Украина.
Амбасадорката Задорожњук ѝ се заблагодари на Република Северна Македонија, која заедно со земјите од Европска Унија и НАТО е официјален учесник во Кримската платформа.
„Ние, исто така, го цениме тоа што Северна Македонија не само што ги поддржува сите украински резолуции за Крим, туку е и нивен коавтор. Конкретно, тоа се резолуциите усвоени во рамки на Генералното собрание на ОН – „Проблемот на милитаризација на Автономната Република Крим и градот Севастопол, Украина и делови од Црното и Азовското Море“ и „Ситуацијата со човековите права во Автономната Република Крим и градот Севастопол, Украина“.
Во интервјуто, амасадорката на Украина, Наталија Задорожњук апелираме до почитуваните експерти, да го пренесуваат не само она што го пишува руската пропаганда, туку да користат, ако не украински, тогаш барем сериозни материјали на англиски јазик.
Задорожњук нагласи дека Амбасадата на Украина, пак од своја страна, е секогаш отворена за печатот и е подготвена да обезбеди целосни информации за кое било прашање.
Целото интервју можете да го прочитате тука.