Додека Либерално-демократската партија бележи најлоши резултати откако е формирана, претседателот Горан Милевски место за партијата работи за фамилијата, обвинуваат негови сопартијци.
Велат дека лидерот Милевски од позиција министер влијаел и успеал да ја вработи сопругата на Клиника а да добие и државна специјализација, баџанакот го назначил за директор на држвна Лотарија, а членува и во Управниот одбор на Агенцијата за пошти додека неговата сопруга е вработена во Државниот испитен центар, братучедот го вработил во Државната видео лотарија, кумашинот во Идризово, а кумашинката си ја зел во неговиот кабинет во Министерството за локална самоуправа.
,,Резултати на ЛДП ги нема, но затоа Горан Милевски покра своето загарантирано министерско место, ги има вработено речиси цело потесно семејство во државни институции, без никакви консултации ниту со членството, ниту пак со согласност на партиските органи. Членовите на партиските органи на Либерално демократската партија. Централниот одбор и Извршниот одбор, веќе извесно време бараат одговорност од Милевски и за моменталната состојба на партијата, како и личниот дебакл на локалните избори во Битола, но одговори нема “, oбвинуваат сопартијци на Милевски.
Претседателот Милевски, пак за ,,A1он” ги негира сите наводи на сопартијците.
,,Првпат од вас слушам за вакви обвинувања. Некој грешно ве брифирал. Централниот одбор едногласно ги прифати известајот од локалните избори со кој партијата изрази задоволство од изборните резултати. Во однос на непотизмот, јас никого никаде немам вработено. Партијата не е биро за вработување за да дискутираме кој каде од членовите ке се вработи или каде работи. но таква тема досега не сме дискутирале.
ЛДП на последните локални избори излезе од централната владејачка коалиција и настапи заедно со партијата ДОМ, но сепак остана во владата и Милевски го задржа министерското столче во Министерството за локална самоуправа, а предложен е и од мандатарот Димитар Ковачевски во новиот состав на Владата предводена од СДСМ.
извор: A1он.мк
