Неопходно е да се зачува споменот на жртвите на холокаустот и да се спречи тоа да се повтори, како и да се спречи насилството никогаш повторно да не се користи како политички инструмент, изјави денеска австрискиот претседател, Александар ван дер Белен, по повод одбележувањето на Меѓународниот ден на сеќавање на холокаустот.
Ван дер Белен посочи дека желбата и обврската на Австријците е да го зачуваат споменот на жртвите, како и да не заборават дека не само жртвите, туку и криминалците биле дел од австриското општество.
Тој спомен, додаде претседателот, може да биде достоен само ако одлучно се води борбата против антисемитизмот и расизмот.
-Ерата на нацистичкиот режим е едно од најмрачните поглавја во австриската и европската историја. Австрија ќе продолжи да се бори против сите форми на антисемитизам, бидејќи во нашето општество нема место за омраза, изјави австрискиот канцелар Карл Нехамер.
Вицеканцеларот Вернер Коглер,пак, истакна дека злосторствата на нацизмот никогаш не смеат да се повторат и дека е неопходно да се спротивставиме на секоја омраза. /МИА/
