Германските истражители откриле околу 400 случаи на говор на омраза на Интернет, во врска со минатонеделното убиство на двајцата полицајци, што очигледно го извршиле ловокрадци за да избегнат апсење, соопштија официјални лица.
Од 399 објави на Интернет, 102 се „релевантни за кривичната истрага“, а во 15 случаи полицијата веќе ги пронашла одговорните, изјавија претставници на западногерманската покраина Рајнската област Пфалц.
Регионалното Министерство за внатрешни работи соопшти дека, по повод објавите на Интернет, нема да толерира луѓето „да го слават ладнокрвното убиство на двајца полицајци и да се исмеваат со жртвите“.
Минатиот понеделник рано утрината, двајца мажи пукале од ловечко оружје кон полицајците кои ги сретнале на селски пат со диви животни фатени во комбе.
Осомничените беа уапсени неколку часа по нападот.
Кон крајот на минатата недела, еден маж беше уапсен поради видео во кое маскиран говорник ги повикува луѓето да ги намамат полицајците на руралните патишта за да ги убијат.
Извор: МИА
