РИБАРО
ВМРО-ДПМНЕ ќе го продаваат своето партиско седиште олицетворено во „велелепниот“ ново-барокен објект познат како бела палата, информираат вмровските извори за АХА.
Парите од продажбата, како што велат изворите на АХА, Мицкоски планирал да ги донира на граѓаните од општините каде победија вмровските градоначалници и кои се погодени од бранот поскапувања предизвикани од руската инвазија врз Украина и светските мешетарења со цената на горивата и енергенсите.
– Кога може Роман Абрамович да го продаде Челзи, што па да не можам јас божем да ја продадам белава палата, рекол Мицкоски во своето обраќање пред партиските колеги.
– Шефе извинете, ама знаете, Абрамович е…
– Што е Абрамович, ајде да те чујам?! Сакаш да кажеш дека не можам да се мерам со него?
– Не, ама…
Нема ама. Мора да му парираме некако на Ковачевски и мерките за олеснување што ги предлагаат. Нè уби во поим со оние 26 мерки за помош на граѓаните и компаниите, во вредност од 400 милиони евра, со кои ќе се ублажуваат последиците од економската криза. Ќе се намалува цената на горивата преку намалени акцизи и ДДВ, а најранливите категории граѓани ќе добијат субвенции. Се укинува ДДВ за лебот, шеќерот, брашното тип 400, зејтинот, трајното млеко, свежото месо, оризот и јајцата. Ќе се замрзнат и маржите за основните прехранбени производи и ќе се укинат царинските давачки за.. што ти јас знам колку производи. Поконкретно од ова здравје!
Како ние јадни да одговориме на ова, а?
Кој му го одобри соопштението вчера на Трајко? Пелтечи таму пред камери, као не биле јасни мерките на Владата? А бе, ни се смеат сите! Што ќе правиме утре во Парламент кога ќе треба да се гласаат меркиве? Нема да кренеме рака?
Мора да одиме со нешто популистички. Ќе кажеме дека ја продаваме палатата. Мора да замајуваме јавност дека мислиме на народот, рекол Мицкоски пред своите сопартијци видно возбуден од својата досетка.
Заев е крив! Ковачевски е крив за светската економска криза и војната во Украина! Продажбата на нашата љубена палата, е мерката која ја презема патриотското вмро во знак на револт поради немањето осет на владата за проблемите на граѓаните. Мицкоски како докажан добродетел и ВМРО-ДПМНЕ како најблагородна семакедонска народна партија што се покаја за поренашните гревови – за мега кражбата од 700 милиони евра пари на граѓаните за Скопје 2014, мора да ја преземе одговорноста за овој напатен и ограбен народ. Ќе се оградиме и од Груевски, ако треба се разбира…, ете ова е говорот што треба да го спремите, им се обратил Мицкоски на своите пред да ја напушти салата за состаноци.
– Шефе, како тоа мислиш ќе се откажеме од Груевски, ако треба?
– Па исто како што као ќе ја продадеме палатава бе неранимајко, му врати Мицкоски на партискиот колега.
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK