Колку количини на пченица, сончоглед, јачмен и останати суровини ќе се увезат од соседна Србија ќе зависи од македонските компании и трговците, истакна денеска министерот за земјоделство, шумарство, водостопанство, Љупчо Николовски при посетата на фабриката за производство на масло за јадење „Брилијант“ во Штип, јавува МИА.
Очекува следната недела, кога ќе завршат административниот дел и формалностите да почне увозот на лебното зрно и останатите суровини, за кои македонските компании имаат договорено со своите партнери од Србија.
Николовски посочи дека задача на Министерството и на Владата беше да обезбеди да се тргне забраната за извоз на пченица и на останати суровини од страна на Србија.
-Количините кои се неопходни ние ги прегледавме, искомунициравме и одржавме состаноци со сите комори, со сите економско-социјални партнери на Министерството, со сите компании, коишто имаат договори се со цел бидат земени предвид. Договорот којшто е постигнат е дека е отстранета забраната за извоз кон Република Северна Македонија и второ дека ќе се реализираат сите договори меѓу трговските партнери, вели Николовски.
Посочи дека како Влада не преговораат колку количини на пченица и на останатите суровини ќе се узвезат од соседна Србија, туку на компаниите им обезбедија да се тргне забраната
-Она што бевме информирани дека од Србија се бара и од многу европски земји, огромни количини на пченица и на други производи. Меѓутоа приоритет имаат земјите од „Отворен Балкан“, С Македонија и Србија се основачи на „Отворен Балкан“ и гледаме дека како во време на светска криза, во време на војна, во време на затворени пазари, ние сега имаме отворен пазар. Ние сега имаме дијалог, соработка и го постигнавме тој договор, вели Николовски.
