Руските војници се обидуваат да го запрат напредувањето на киевските сили долж украинско-руската граница во североисточниот регион Харков, соопшти денеска украинското Министерство за одбрана.
„Единиците на руската армија се прегрупираа и се обидуваат да спречат понатамошно напредување на нашите војници во правец на државната граница на Украина“, се вели во соопштението.
Се додава дека „Русија врши континуирани артилериски напади врз украинските единици со цел да предизвика човечки загуби и штета на оружје и воена опрема“, а московските трупи отвораат оган „по целата линија на конфликтот“ во источна Украина и се обидуваат да ја пробијат украинската одбрана.
„Руските сили продолжија со обидите да нападнат неколку градови во индустриското срце на Украина, Донбас, но без успех“, соопшти Генералштабот на украинската армија./МИА/.
