Полицијата идентификуваше уште еден руски војник кој силувал жени во регионот на Киев (Кијив). Станува збор за Булат Фасахов, 20-годишен радио оператор од 30-та Посебна бригада на моторизирана пушка (пешадија), пренесува Украинска правда.
„Идентификуван е уште еден осомничен за насилството врз жените во Киевската област. Ова е вториот руски силувач што го разоткривме – 20-годишниот Булат Фасахов – радиотелефонист на артилериската дивизија на 30-та посебна моторизирана пешадиска бригада на 2-та гардиска комбинирана армија на Централниот воен округ на вооружените сили на Руската Федерација“, објави јавната обвинителка на Украина, Ирина Венедиктова на Фејсбук.
Според Венедиктова, регионалното обвинителство во Киев, во соработка со Службата за безбедност на Украина, го разоткри војникот и го извести дека е под сомнение дека ги прекршил законите и обичаите на војната.
Венедиктова додаде дека во март Фасахов и неговиот колега упаднале во приватна куќа во село во областа Броварски. Тој му наредил на својот соучесник да ги затвори сите станари во куќата во подрум, освен една жена. Заплашувајќи ја жртвата со оружје и заканувајќи ѝ се дека ќе го масакрира нејзиното семејство, Фасахов ја силувал.
Неколку дена подоцна, военото злосторство се повтори. Истиот војник, заедно со уште тројца отишле во друга куќа. Семејството било изнесено надвор, оставајќи една жена која мажите наизменично ја силувале, заканувајќи се дека ќе ја убијат.
Венедиктова додаде дека идентификацијата на другите инволвирани во овие злосторства е во тек.
„Доколку сте го препознале осомничениот или имате информации за вмешаноста на овој војник на руските вооружени сили или неговите соучесници во други воени злосторства, пријавете го ова во нашиот единствен центар за докази warcrimes.gov.ua или контактирајте го киевското регионалното обвинителство: 097-053-04 -65, 097-838-31-87, 050-107-66-75“ – рече Венедиктова.
Обработка; И. Т. З.
