Одржана е Регионалната конференција „Претставеност на помалкубројните заедници на државно и локално ниво”, како дел од проектот „Зачувување на културата на Хрватската заедница и останатите помалкубројни заедници во РСМ”, поддржан од Агенцијата за остварување на правата на заедниците, а во организација на ЗХРСМ, објави Џелал Хоџиќ од Агенцијата за остварување на правата на заедниците и претседател на СДА, кој воедно беше и модератор на Конференцијата.
Поздравни обраќања имаа Роберет Алаѓозовски – национален координатор за интеркултурализам и едно општество, Н.Е. Нивес Тигањ – Амбасадор на Република Хрватска во Република Северна Македонија, Еран Куртиш – Директор на Агенцијата за остварување на правата на заедниците и Невенка Костовска- Претседател на Заедницата на Хрвати во Република Северна Македонија.
Во работниот дел на конференцијата свое излагање имаа: Џабир Доко – заменик министер во Министерството за политички систем односи помеѓу заедниците , Дуда Баље – Пратеник во Парламентот на Р.Косово, Алмир Велији – замник министер за Регионален развој на Р.Косово, Мирза Хајдиновиќ – секретар на Бошњачкиот национален совет во Р.Србија, Санела Шкријељ – Пратеник во македонското Собрание, Иван Брадиќ – претставник на Хрватскиот светски конгрес од Германија и Жарко Камчев – претставник на Заедницата на Хрвати во Република Северна Македонија.
На конференцијата, како што објави Хоџиќ, беше поздравен напредокот на правата на помалкубројните заедници што од 2017 год. континуирано се одвива.
„Беше нотирано дека треба да се реализираат уставните и законските права во сите области важни за помалкубројните заедници. Поздравена е стратегијата „Едно општество за сите“ и развивањето на Република Северна Македонија како граѓанска држава. Се поздрави и дебатата во општеството за подобрување на изборниот законик со цел подобра преставеност на помалкубројните заедници. Нотирано е дека од суштинско значење е функционирањето на правната држава, почитувањето на Уставот и законите како и функционалноста на институциите, а дополнително се поздравуваат демократските процеси и евроатланските интеграции на сите држави од Западен Балкан. Различноста е повеќе димензионална, па се зборуваше и за правата на жените, младите и лицата со попреченост.“, извести Хоџиќ.
Тој нагласува дека хрватаската заедница го реафирмираше барањето да биде дел од преамбулата на Уставот на Р.Северна Македонија како и застапена на раководните места на државно и локално ниво.
J. Ѓ.