Германија разговара за безбедносните гаранции за Украина со своите сојузници со цел да се подготви за периодот по завршувањето на војната во Украина, изјави денеска германскиот канцелар Олаф Шолц за ТВ каналот АРД.
„Со блиски пријатели разговараме за безбедносните гаранции што можеме да ги обезбедиме. Ова е долг процес. Јасно е дека ситуацијата нема да биде иста како што би била за една од членките на НАТО“, рече Шолц.
Тој додаде дека внимателно се подготвуваат во дипломатската сфера „за денот кога сите се надеваме дека ќе дојде наскоро – денот кога војната ќе заврши“.
Одговарајќи на прашања поврзани со енергетската криза, германскиот канцелар ја отфрли идејата за воведување ограничувања на брзината на германските автопати како начин за борба против климатската и енергетската криза.
„Оваа влада не се договори за ова и нема да дојде до тоа“, рече Шолц во интервјуто, одговарајќи на директни прашања од публиката.
Германија е позната по своите автопати без строги ограничувања на брзината. Според експертите, ограничувањето на брзината од 130 километри на час значително ќе ги намали емисиите на јаглерод и ќе ја намали зависноста на Германија од рускиот увоз на енергија. /MИА/.
