Собранието денеска усвои повеќе предлог закони од различни области. Во рамки на продолжението на 71. седница пратениците го усвоија Предлог-законот за дополнување на Законот за животната средина, поднесен од пратениците Ненад Коциќ од СДСМ и Маја Морачанин од ДОМ.
Исто така, беа усвоени и предлог одлуките за испраќање на припадник на Армијата во меѓународната операција на Европската Унија „АЛТЕА“ во Босна и Херцеговина, како и во „EUTM RCA“ во Централноафриканската Република.
Со 62 гласа „за“ пратениците го усвоија и Дополнетиот предлог на закон за финансиска стабилност, а со исто толку гласа е усвоен и Законот за вршење сметководствени работи.
На седницата беа усвоени и измените на законите за финансиски друштва, за фондот за осигурување на депозити, за лизинг, како и за меница. Пратениците ги усвоија и измените на законите за супервизија на осигурување, за детективска дејност, за гранична контрола и за оружје.
Со 61 глас „за“, Собранието го усвои и измените на Законот за прекршоците против јавниот ред и мир.
Во рамки на 79. седница беа прифатени измените на Законот за служба во Армијата, додека на продолжението на 82. седница, беа усвоени измените на Законот за финансирање на единиците на локалната самоуправа, како и измените на Законот за основање на Универзитет „Мајка Тереза” во Скопје. Во рамки на 57. седница пратениците ги усвоија и измените на Законот за репродуктивен материјал од шумски видови дрвја./МИА/
