Договорите од „Отворен Балкан“ со кои што се предвидува работници од Македонија, Србија и Албанија да конкурираат на пазарот на труд во сите три земји, не се ратификувани само во македонскиот парламент. Опозицијата не дава поддршка. Велат дека не им е јасна целта на „Отворен Балкан“, пишува Радио Слободна Европа.

Сè уште не се укинати работните дозволи за да може државјаните на Македонија, Албанија и Србија слободно да работат во која било од земјите.

Од владата ги повикуваат пратениците итно да ја свикаат собраниската Комисија за надворешни работи и да ги стават на дневен ред овие протоколи и договори.

Мицкоски преку Милошоски ги кочи вработувањата преку Отворен Балкан

Претседателот на ВМРО-ДПМНЕ, Христијан Мицкоски преку пратеникот Антонио Милошоски кој е претседател на собраниската Комисија за надворешни работи, ги кочи вработувањата преку Отворен Балкан.

Мицкоски сега вели не знаел што е Отворен Балкан, иако лани велеше дека тоа е добра иницијатива, потсети Националната координаторка за регионална соработка и европски интеграции, Нора Исмајлоска Старова.

Мицкоски пред неполна година за српска Политика изјавуваше дека Отворен Балкан е добра можност за олеснета комуникација на земјите од регионот, а деновиве сосема спротивно се чуди како можеле да соработуваат две земји што не се граничат (Албанија и Србија) и дека немал информации за иницијативата, реагира  Исмајлоска Старова.

И Пратеникот Миле Талевски вчера го повика Антонио Милошоски да не ја кочи ратификацијата на договорите за Отврен Балкан и веднаш да закаже седница.

„Ги повикавме ВМРО-ДПМНЕ, Антонио Милошоски да ја прекине праксата којашто ја наметна во Собранието преку Комисијата за надворешни работи којашто ја раководи тој, а тоа е да кочи и да го блокира целиот процес којшто се однесува во делот на надворешната политика на нашата држава. Бараме да се откочат сите оние ратификации којшто се во делот за подобрување, односно олеснување на условите за размена на работници помеѓу државите вклучени во поектот Отворен Балкан. Досега немаме никаков одговор од страна на Антонио Милошоски“, рече Талевски.

Националниот координатор за „Отворен Балкан“ и регионална соработка, Марјан Забрчанец во изјава за Фронтлајн, вели дека неодговорно и на штета на граѓаните и на бизнис секторот е блокирањето на договорите од Отворен Балкан од страна на пратеникот Милошоски.

„Ратификацијата на договорите за слободен пристап до пазарот на трудот и за идентификациски број за граѓаните на Отворен Балкан мора да се заврши во Собранието за да може да стартува проектот за слободно ангажирање работна сила во која било од трите држави без работни дозволи“ – вели Забрчанец.

Тој смета дека Милошоски има обврска да одговори на прашањата дали се работи за координиран обид на ВМРО-ДПМНЕ да ја кочат регионалната иницијатива што ја поддржуваат граѓаните од сите три држави.

Според Договорот потпишан во Тирана, договорните страни треба да ги поедностават административните процедури за влез, движење, престој и работа на граѓаните на земјите потписнички. А земјите ќе гарантираат дека сите ќе имаат еднаков пристап на работа, без разлика од која земја од потписничките доаѓаат.

Лицето кое ќе сака да работи во една од државите од Отворен Балкан нема да мора да добие работна дозвола и дозвола за престој во земјата што го прима.

Ј. Ѓ.