Во Босна и Херцеговина денеска се одржуваат општи избори на кои граѓаните ќе избираат свои претставници на сите нивоа на власта – во државата, Федерацијата БиХ и Република Српска.
На повеќе од 5.900 избирачки места, кои се отворени од 7 до 19 часот, граѓаните ќе избираат тројца членови на Претседателството на БиХ (по еден од трите конститутивни народи – Бошњаци, Срби и Хрвати), пратеници за Претставничкиот дом на Парламентарното собрание на БиХ и пратеници во Претставничкиот дом на Парламентот на Федерацијата Босна и Херцеговина.
На деветтите општи избори во Босна и Херцеговина граѓаните избираат и претседател на Република Српска, двајца потпретседатели на Република Српска, пратеници на Народното собрание на Република Српска (НСРС), како и пратеници на собранијата на 10 кантони во Федерацијата Босна и Херцеговина.
Според податоците на Централната изборна комисија (ЦИК), право на глас во БиХ имаат 3.368.666 гласачи.
На изборите учествуваат 90 политички партии, 38 коалиции и 17 независни кандидати, што е најмногу досега.
Граѓаните избираат 518 претставници меѓу 7.743 кандидати, кои ќе ги претставуваат на сите нивоа на власт во државата и двата ентитета.
За членови на Претседателството на Босна и Херцеговина се кандидирани вкупно 10 кандидати, по пет од двата ентитета.
Членовите на Претседателството на БиХ се избираат во две изборни единици – Федерацијата БиХ, каде се избираат два члена, еден од редовите на бошњачкиот и еден од хрватскиот народ, и во Република Српска, која го избира српскиот член на овој највисок државен орган.
Борјана Кришто (ХДЗБИХ) и Жељко Комшиќ (ДФ), Денис Беќировиќ (СДП), кој доби поддршка и од 10 опозициски партии, Бакир Изетбеговиќ (СДА) и Мирсад Хаџикадиќ од Коалицијата за напредок се кандидати за хрватскиот и бошњачкиот член.
Во игра за српскиот член се Жељка Цвијановиќ, Мирко Шаровиќ, Војин Мијатовиќ, Ненад Нешиќ и Борислав Бијелиќ.
Како што соопшти ЦИК, првите изборни резултати за членови на Претседателството на БиХ би можеле да бидат познати до денеска на полноќ.
Рокот за објавување на конечните резултати е еден месец, односно 1 ноември, кога истекува рокот за формирање нов состав на Претседателството на БиХ и државниот парламент, како и на парламентите на Федерацијата БиХ и Република Српска, и пониските нивоа на власт.
И покрај долгогодишното инсистирање на политичките претставници на Хрватите во БиХ и официјален Загреб за измена на Изборниот закон, овие избори, кои според аналитичарите се најважни од крајот на војната, односно од усвојувањето на Дејтонскиот мировен договор, се одржуваат според старите изборни правила, освен некои технички детали, кои ги наметна високиот претставник Кристијан Шмит користејќи ги овластувањата од Бон.
