Борбата со лажните вести, законската заштита на новинарите, начинот на известување се само дел од темите кои се однесуваат на креирање на здрав медиумски простор. Во оваа битка, според Младен Чадиковски треба да се вклучи целото општество, а медиумските работници/чки треба да бидат заштитени не само заради нив самите туку да бидат во можност подоследно да им служат на граѓаните.
Во разговор со претседателот на Здружението на новинарите се осврнавме кон неколку прашања: измените на Кривичниот законик со кои нападот врз новинарите ќе се смета за напад врз службено лице, дезинформациите и пропагандата, одговорноста во сензибилизирање на јавноста кога се известува за различните заедници…
„Неколку пати апелираме до претседателот на Собранието и до шефовте на пратеничките групи да се изгласаат промените на Кривичниот законик, и никој декларативно нема ништо против бидејќи кога станува збор за новинарите сите имаат полни усти на поддршка, меѓутоа, поради бескрајните политички игри, ова се одлага, додека жртви се и натаму медиумските работници. Ова е неприфатливо и скандалозно, да се кочи Закон за кој постои општ консензус во јавноста да биде донесен. И овој Закон е важен не толку за нас колку и за граѓаните затоа што ние ќе можеме поверно да им служиме“., вели Чадиковски.
Според него, во денешно време е многу модерно политичарите или оние на кои не им одговара тоа што се објавува да се закануваат со тужби, дури и за оние кои не можат да ги добијат, т.н “слеп тужби“ за да влеваат страв или да ги обесхрабрат новинарите да продолжат да пишуваат.
Пријавите за напади на новинари до ЗНМ, најчесто се однесуваат на он лајн напади, особено врз новинарките.
Извор: Цивил медиа
