Потпретседателката на Европската инвестициска банка (ЕИБ), Лилјана Павлова за време на Самитот за Западен Балкан на Берлинскиот процес во 2022 година, ја потврдила поддршката на банката на ЕУ за зелената транзиција и енергетската безбедност на регионот.
Осврнувајќи се на енергетскиот пакет за Западен Балкан што неодамна го објави претседателката на Европската комисија, Урсула фон дер Лајен, потпретседателката Павлова го истакнала ова како јасен доказ за солидарноста на ЕУ со регионот.
„Диверзификацијата на енергетскиот микс и зголемувањето на отпорноста на регионот на климатските промени ќе донесе големи придобивки за граѓаните. Како банка на ЕУ, ЕИБ ќе ве придружува во текот на ова патување. Во срцето на овие напори ќе ја ставиме нашата сеопфатна мешавина на заеми, мешање и советодавни услуги. Како и секогаш, ќе го направиме ова заедно со партнерите и пристапот на Тим Европа за спроведување на Економскиот и инвестицискиот план на Европската унија“ истакнала Павлова.
Во тесна соработка со Европската комисија и другите партнери на Тим Европа, ЕИБ Глобално активно работи на развој на голем број инвестиции во обновлива енергија во регионот, какви што се паркот со ветерници во Влашиќ и соларната централа во Обилиќ. Во исто време, банката развива иновативен финансиски инструмент за регионот за поттикнување на почиста енергија, климатска адаптација и зелен технолошки развој, како и за стимулирање на инвестициите на приватниот сектор во зелената и дигиталната транзиција.
„Конкретно, ќе работиме со вас на обновливата енергија, за да го искористиме значителниот потенцијал за ветерна и соларна енергија во регионот. Ќе ви помогнеме да остварите поефективни инвестиции во електричните мрежи и инфраструктурата за складирање, a може да сметате на ЕИБ да се погрижи дека енергетската ефикасност е составен дел од сите наши инвестиции во транспортот, урбаниот развој, домувањето, управувањето со отпад или развојот на приватниот сектор“ подвлекла Павлова.
Годинава, ЕИБ Глобално обезбеди осум технички грантови во износ од над осум милиони евра за енергетски ефикасни проекти во рамки на нејзината Иницијатива за јакнење на отпорноста на економијата, вклучително и проектот за социјални станови во Тирана и системот за централно греење во Приштина.
„Брзината и прецизноста со која ќе ги имплементирате договорите што ги постигнавте на овој самит денес за енергијата и зелена транзицијата, како и за поголемата мобилност за подобрување на вашиот заеднички регионален пазар, ќе одреди колку брзо може да се остварат придобивки за вашите граѓани“заклучила Павлова.
Од 2009 година, ЕИБ инвестираше 9,5 милијарди евра во Западен Балкан, придонесувајќи за развојот на виталната инфраструктура, растот на приватниот сектор, како и за побезбедна и разновидна енергетска мрежа.
