Две лица загинаа во вторникот попладне, откако проектил погоди област каде се сушеше житото во Пржеводов, полско село во близина на границата со Украина, објавија полските медиуми, пренесува Еуроњуз.
Полскиот премиер Матеуш Моравјецки свика итен состанок на највисоките претставници на земјата за национална безбедност и одбрана, изјави владиниот портпарол Пјотр Мулер.
Premier @MorawieckiM zwołał w trybie pilnym Komitet Rady Ministrów do spraw Bezpieczeństwa Narodowego i spraw Obronnych.
— Piotr Müller (@PiotrMuller) November 15, 2022
Мулер веднаш не ја потврди информацијата за ракетниот напад, но рече дека состанокот се одржал поради „кризна ситуација“.
Висок претставник на американското разузнавање потврди за АП дека руски ракети влегле во Полска. Источноевропската земја што се граничи со Украина е членка на ЕУ и НАТО.
Локалните медиуми јавуваат дека полската полиција, обвинителството и армијата се на лице место во Пржеводов. Пожарникарите од локалната единица потврдија дека во експлозија загинале најмалку две лица.
„Пожарникарите се на лице место, не е јасно што се случило“, изјави Лукаш Куси, дежурен офицер на блиската пожарникарска станица.
Пржеводов, село со 710 жители во источна Полска, се наоѓа на околу 130 километри југоисточно од регионалниот главен град Лублин и 7 километри од Украина.
Русија во вторникот ги нападна градовите низ Украина со проектили во нападите за кои Киев рече дека се најтешкиот бран на ракетни напади во речиси девет месеци војна.
