„Вие сте НАТО и вие сте браникот на современите, цивилизациски вредности. Вие сте составен дел од колективната одбрана која овозможува да живееме во мир, безбедност и стабилност.
Бидете сигурни дека сте повеќе од достојни да бидете рамо до рамо со вашите сојузници зашто вашиот професионализам е видлив, а вашата мотивација висока. Вие сте еднакви меѓу еднаквите и тоа нека биде уште еден мотив да покажете дека Северна Македонија има професионални војници, подофицери и офицери кои се составен и активен дел од нашиот безбедносен чадор – колективната одбрана“ истакна министерката за одбрана Славјанка Петровска на денешната свеченост во касарната „Илинден” во Скопје по повод испраќањето на два вода од Армијата на Република Северна Македонија во борбените групи на НАТО во Бугарија и Романија.
„Завршете ја вашата мисија, помогнете во колективните напори за зацврстување на безбедноста и стабилноста на НАТО и вратете се дома кај своите семејства. Ве очекуваме по вашата ротација со уште поголемо искуство, и со уште посилен мотив да продолжите секојдневно да работите за просперитетот на својата нација.“ рече Петровска.
„Чест ми е што стојам пред вас, припадниците на македонската Армија, нашата НАТО Армија. Вие сте првите единици во борбените групи на Алијансата во Бугарија и во Романија, каде заедно со припадниците на вооружените сојузнички сили сте составен дел од колективниот систем за одвраќање и одбрана. Знам дека одлично ќе се вклопите во заедничкиот тим во овие две земји и дека ќе бидете армиски припадници на кои секој ќе може да се потпре“, кажа министерката за одбрана Славјанка Петровска на денешната свеченост во касарната „Илинден“ во Скопје по повод испраќањето на два вода од Армијата на Република Северна Македонија во борбените групи на НАТО во Бугарија и Романија.
Министерката истакна дека денешната реалност е исполнета со безбедносни предизвици, но дека НАТО е силен и одлучен во својата намера да ја заштити евроатлантската област, вклучувајќи го и нашиот регион и Северна Македонија.
„Нашиот сојузнички одговор е јасен и гласен. Нема да дозволиме никој да ја загрози нашата безбедност и безбедноста на нашите граѓани, нашите блиски и нашите семејства. НАТО е одбранбена алијанса и не претставува закана за ниту една земја, но НАТО е подготвено и обединето во одбраната на секоја педа сојузничка територија, а тоа е факт кој можеме да го видиме и денеска на ова свечено испраќање“, истакна министерката.
На припадниците на Армијата упатени во овие две борбени групи им упати порака да бидат горди на себе зашто се браникот на современите цивилизациски вредности и се составен дел од колективната одбрана која ни овозможува да живееме во мир и безбедност.
