Српскиот претседател Александар Вучиќ ја критикуваше одлуката на косовскиот премиер Албин Курти да го постави Ненад Рашиќ за косовски министер за заедници и враќање. Вучиќ употреби непримерен јазик за Рада Трајковиќ, која беше поставена за советничка на Рашиќ, нарекувајќи ја „српскo ѓубрe од дното на кадата“, додека ни за Курти не ја ублажи својата реторика доделувајќи му го епитетот „терористичко ѓубре“, пренесува српска N1.
„Изборот на Рашиќ, човек кој доби помалку од еден процент, како и на Рада Трајковиќ, која беше на неговата листа, покажува дека тие сакаат прогон, протерување и исчезнување на Србите на Косово и Метохија. И сега имам неколку работи да кажам, пред официјалното обраќање и средба со Вархеји, ако воопшто дојде до тоа“, изјави Александар Вучиќ за Пинк.
Тој додаде дека „нема полоши“ од Расиќ и Трајковиќ и дека ја немаат довербата на Србите во Косово, „туку довербата на западните агенции и терористичкиото ѓубре Курти“.
Тој ја нарече срамна реакцијата на ЕУ за именувањето на Рашиќ и нагласи дека поради ова српската делегација нема да учествува на самитот на ЕУ и Западен Балкан во Тирана.
„Никој од Србија нема да биде во Тирана на 6 декември, ајде убаво, земи си ги дневниците, патувај како сакаш, сите од Европа, сите од Западен Балкан, пишувајте како Србија е виновна за нешто. “, рече Вучиќ.
Обраќајќи му се на Курти, Вучиќ рече дека „се грижи да не повреди ниту еден Србин, заедно со квислинзите што ги избрал“, бидејќи Србите заедно со државата Србија „ќе знаат како да одговорат“.
Да потсетиме, косовскиот премиер Албин Курти на функцијата министер за заедници и враќање во косовската влада го назначи претседателот на Прогресивната демократска партија Ненад Рашиќ, а за советничка на Рашиќ, Рада Трајковиќ.
Трајковиќ за KoSSev изјавила дека политиката на Вучиќ, како и на Милан Радоичиќ, нема да има влијание врз нејзината и работата на Рашиќ и дека еден од нејзините приоритети ќе биде „разбивање на монополот на Српската листа над менталната промоција на Србите“.
