Со растот на минималната плата ќе продолжат да растат и платите во образованието. Од Владата информираат дека во предлог-буџетот за наредната година се предвидени средства за растот на платите во овој сектор.
-Предвидено е да продолжи усогласувањето на минималната плата со просечната и трошоците на живот, соодветно на системското утврдено решение. Предвидени се и зголемувањата на платите во образование, како и зголемувањето на пензиите по новата утврдена методологија кое зголемување треба да се случи првиот квартал идната година, рече премиерот Димитар Ковачевски.
Ова ново зголемување доаѓа откако Самостојниот синдикат за образование, наука и култура и Министерството за образование и наука потпишаа Спогодба за повисоки плати во основното и средното образование за 15 отсто од септемвриската плата. Но, во Спогодбата, потпишана од лидерот на СОНК Јаким Неделков и министерот за образование Јетон Шаќири се вели дека најниската плата за најниската сложеност за вработените во основните училишта изнесува 16.973 денари и дека ќе се применува со исплатата за септември 2022. Сепак во документот е утврдено дека основната плата на работникот не може да биде пониска од објавената висина на минималната плата во бруто износ во Република Северна Македонија во тековната година
Засега нема точна информација колку вработени во образовниот сектор ќе може да очекуваат повисоки примања напролет, иако годинава се зголемија платите во образование за 15 отсто за над 37000 вработени.
-Во Предлог-буџетот за 2023 година точно и прецизно се планирани средства за плати согласно растот на минималната плата и усогласувањето кај останатите вработени, содржи 250 милиони евра за справување со кризата, средства за зголемените пензии, а ѕвезда водилка на овој Предлог-буџет ќе бидат капиталните инвестиции, рече неодамна заменикот министер за финансии Филип Николоски.
Претходно од МОН кажаа дека ја реализирале заложбата наставниците да го добијат заслужениот статус во општествената хиерархија за да можат да бидат главен фактор во унапредувањето на квалитетот на образованието.
-Министерството за образование и наука обезбедува услови за нивен професионален и кариерен развој преку постојани обуки и можности за напредување во звања. Заедно со досегашните зголемувања од 21 процент, вработените во образованието добиваат историски најголема поддршка. И во услови на економска и енергетска криза, пари за наставниците има, пишува во соопштението на МОН.
Големите покачувања на платите во образовниот сектор започнаа во 2020-тата година, кога беше договорено етапно зголемување а 21 процент, кога повисоки плати добија околу 20.000 вработени во основното образование, 8.000 во средното, 4.500 во високото образование и 220 вработени во научните институции.
Ќе биде ли УКИМ дел од буџетот?
Последно, иницијатива за зголемување на платите покренаа вработените во високото образование. Според Синдикатот на УКИМ тие добиле ветување дека до крајот на месецот ќе биде потпишан нов Колективен договор, со кој се очекува наставниот и ненаставниот кадар да има зголемување на платите за по 25% во наредните четири години.
Д.Е.