Претседателот Стево Пендаровски, во рамки на проектот „Лице в лице со претседателот“ денеска го посети Штип, каде одржа предавање на Правниот факултет при универзитетот „Гоце Делчев“.
Пред студентите кои следат настава по предметите Политички систем и Теорија на држава и право, Пендаровски говореше на тема „Практични аспекти на надлежностите и функционирањето на Претседателот на Република Северна Македонија“.
Тој ги запозна студентите со условите и начинот на избор, надлежности на институцијата, неговите права и должности пропишани со Уставот и законите. Одговараше и на прашања од студентите за повеќе аспекти од неговата функција, законската регулатива, како и за актуелните состојби во државата и регионот
Прашан за состојбата во Косово, Пендаровски рече дека во регионот последниве денови повторно се актуелни тензиите во северниот дел на Косово и во таа насока добива прашања дали размислува за свикување за Советот за безбедност. Претседателот им појасни на студентите дека таму постои мисија на НАТО, каде што ние имаме 65 војници во последниве две години, заедно со уште 20-тина нации кои партиципираат и дека во разговор со командантот на таа мисија добил уверување дека нема да се случи ескалација од било која страна.
– Затоа, не гледам причина да се паничи народот и да го свикувам Советот за безбедност. Таму има мисија на НАТО која ги има сите овластувања и двете страни од тој потенцијален спор ја почитуваат мисијата на НАТО, рече Пендаровски.
Во однос на дојавите за бомби, претседателот Пендаровски, изјави дека компјутерскиот криминал тешко се докажува и дека е потребно време. Но, од аспект на преземените оперативни мерки, подвлече, децата во училиштата се безбедни, дека постои 24 часовен мониторинг врз училиштата и институциите и дека надлежните ги преземаат сите потребни активности.
– За судски завршници мислам дека ќе почекаме и ќе биде потешко, но во однос на конкретните мерки за заштита на нашето население јас сум сигурен дека во рамки на нашите надлежности и можности правиме сè што можеме, вели Пендаровски
Претходно, претседателот Пендаровски одржа средба со ректорот на Универзитетот „Гоце Делчев“, проф. д-р Дејан Мираковски, кој стапи на функцијата оваа година. На средбата, Пендаровски беше запознаен со тековната работа на Универзитетот, како и плановите за активности во следниот период. Претседателот Пендаровски на ректорот Мираковски му посака успешно извршување на функцијата. вдј/цр
